كوكشەتاۋ قالاسىنداعى نەگىزگى جىلۋ كوزى سانالاتىن رك-2 قازاندىعىن جاڭارتۋعا قازاقستان رەسپۋبليكاسى ۇكىمەتىنىڭ رەزەرۆىنەن 1,1 ميلليارد تەڭگەدەن استام قارجى ءبولىندى. بۇل قاراجات 2025–2026 جىلدارداعى جىلۋ بەرۋ ماۋسىمىنا دايىندىق اياسىندا يگەرىلەدى.
اتالعان شەشىم مەملەكەت باسشىسى قاسىم-جومارت توقاەۆتىڭ ينجەنەرلىك جەلىلەردىڭ توزۋىن ازايتۋ جونىندەگى تاپسىرماسىنا سايكەس قابىلداندى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى.
«قاراجات اقمولا وبلىسىنىڭ بيۋدجەتىنە اۋدارىلدى. ەندى بۇل قاراجات ەسەبىنەن اۆتوماتتاندىرىلعان باسقارۋ جۇيەسى، باقىلاۋ-ولشەۋ اسپاپتارى، جىلۋ الماسۋ بەتتەرى جانە پايدالانىلۋ مەرزىمى اياقتالعان جابدىقتار تولىقتاي جاڭارتىلادى»، – دەپ مالىمدەدى ۇكىمەتتىڭ ءباسپاسوز قىزمەتى.
سونىمەن قاتار، اۋا جىلىتقىش كۋبتارىن جانە باسقا دا قازاندىق اگرەگاتتارىنداعى توراپتاردى جوندەۋ جوسپارلانعان.
ايتا كەتەيىك، رك-2 قازاندىعى – كوكشەتاۋ قالاسىن جىلۋمەن قامتاماسىز ەتەتىن نەگىزگى نىسان. 1977 جىلدان بەرى جۇمىس ىستەپ كەلە جاتقان جىلۋ جەلىلەرىنىڭ جالپى ۇزىندىعى 188,7 شاقىرىمدى قۇرايدى. قازىرگى تاڭدا قۇبىرلاردىڭ باسىم بولىگى توزعان، الايدا جاڭعىرتۋ جۇمىستارى جۇرگىزىلىپ جاتىر.
وتكەن جىلى دا ۇكىمەت رەزەرۆىنەن بولىنگەن قاراجات ەسەبىنەن 6 شاقىرىم ماگيسترالدى جەلى مەن ەكى قازاندىق اگرەگاتى جوندەلگەن بولاتىن. ناتيجەسىندە، جەلىلەردىڭ توزۋ دەڭگەيى 45%-دان 43%-عا تومەندەدى، ال اپاتتار سانى 62-دەن 47-گە ازايعان.
مامانداردىڭ ايتۋىنشا، جۇرگىزىلىپ جاتقان كەشەندى جۇمىستار قالانىڭ جىلۋ جۇيەسىنىڭ سەنىمدىلىگىن ارتتىرىپ، الداعى جىلۋ بەرۋ ماۋسىمىن قيىندىقسىز وتكىزۋگە مۇمكىندىك بەرەدى.
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز