اقمولا وبلىسىندا مۇگەدەكتىگى بار جاندارعا الەۋمەتتىك قولداۋ كورسەتۋ ماسەلەسى ۇنەمى جەرگىلىكتى بيلىكتىڭ نازارىندا. سوڭعى مالىمەتتەرگە سايكەس، وڭىردە 29 مىڭنان استام مۇمكىندىگى شەكتەۋلى ادام تۇرادى، ولاردىڭ ءۇش مىڭنان استامى – بالالار. وبلىستا بۇل ساناتتاعى ازاماتتارعا كومەك كورسەتۋ شارالارى كەڭەيتىلىپ، قولجەتىمدى ينفراقۇرىلىم جۇيەلى تۇردە دامىتىلۋدا.
بۇگىندە 5,6 مىڭنان استام ادام قاجەتتى وڭالتۋ قۇرالدارى مەن قىزمەتتەرىنە قول جەتكىزدى. بۇل – كومەككە ءزارۋ جانداردىڭ جالپى سانىنىڭ شامامەن 60 پايىزى. ولارعا پروتەزدىك-ورتوپەديالىق كومەك، كورۋ جانە ەستۋ قابىلەتى تومەن ادامدارعا ارنالعان ارنايى قۇرالدار، اربالار، ساناتوري-كۋرورتتىق ەم الۋ مۇمكىندىگى، جەكە كومەكشىلەر مەن ىمداۋ ءتىلى ماماندارىنىڭ قىزمەتتەرى ۇسىنىلدى. گيگيەنالىق قۇرالدارمەن دە تۇراقتى تۇردە قامتاماسىز ەتىلۋدە.
سونىمەن قاتار وبلىستا الەۋمەتتىك ينفراقۇرىلىم نىساندارىن بەيىمدەۋ جۇمىستارى جۇرگىزىلۋدە. بيىل 192 نىساندى قايتا جاڭعىرتۋ جوسپارى جاسالعان. بۇل – تىرەك-قيمىل جۇيەسى، كورۋ جانە ەستۋ قابىلەتى بۇزىلعان جانداردىڭ ەركىن قوزعالىپ، قوعام ومىرىنە تولىققاندى ارالاسۋىنا مۇمكىندىك بەرەتىن جاعدايلار جاساۋ باعىتىنداعى ناقتى قادام. قازىردىڭ وزىندە سەگىز نىسان بەيىمدەلىپ ۇلگەرگەن، بۇل جۇمىس جالعاسۋدا.
ادرەستىك كومەكتىڭ ءتيىمدى قۇرالدارىنىڭ ءبىرى – “تسيفرلىق وتباسى كارتاسى”. بۇل كارتادا وبلىس تۇرعىندارىنىڭ 768 مىڭعا جۋىق دەرەگى جيناقتالعان. ونىڭ كومەگىمەن ەڭ وسال ساناتتاعى ازاماتتاردى جەدەل انىقتاپ، ءتيىستى كومەك كورسەتۋگە مۇمكىندىك بار. قازىرگى تاڭدا 51 مىڭنان استام داعدارىستىق جانە شۇعىل كومەكتى قاجەت ەتەتىن وتباسى ەرەكشە باقىلاۋعا الىنعان.
جۇيەلى كوزقاراس، تسيفرلىق شەشىمدەردى ەنگىزۋ جانە جەرگىلىكتى جەردە جۇرگىزىلىپ جاتقان بەلسەندى جۇمىستار اقمولا وبلىسىندا مۇگەدەكتىگى بار ادامداردىڭ ءومىر ساپاسىن ارتتىرىپ قانا قويماي، ولاردىڭ قوعامعا كىرىگۋىنە دە جول اشۋدا. مۇندا قامقورلىق جاي ءسوز جۇزىندە ەمەس، ناقتى ناتيجەلەرمەن جانە دەرەكتەرمەن دالەلدەنىپ وتىر.
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز