1972 جىلى ۆەنەرانى زەرتتەۋ ماقساتىندا ۇشىرىلعان كەڭەستىك اۆتوماتتى “كوسموس-482” عارىش اپپاراتى وربيتادان شىعىپ، ءۇندى مۇحيتىنا قۇلادى، دەپ حابارلايدى “ادىرنا” ۇلتتىق پورتالى تاسس-قا سىلتەپ.
رەسمي مالىمەتكە سايكەس، اپپارات 2025 جىلعى 7 مامىر كۇنى استانا ۋاقىتىمەن ساعات 11:24-تە اتموسفەرانىڭ تىعىز قاباتتارىنا ەنىپ، ورتا اندامان ارالىنان باتىسقا قاراي شامامەن 560 شاقىرىم جەردە، دجاكارتا قالاسىنىڭ باتىسىنداعى ءۇندى مۇحيتىنا قۇلاعان. قۇلاعاننان كەيىن قۇرىلعى ءوز قىزمەتىن تولىقتاي توقتاتتى.
ايتا كەتەيىك، “كوسموس-482” اپپاراتى 1972 جىلدىڭ كوكتەمىندە ۆەنەرا عالامشارىن زەرتتەۋ ماقساتىندا ۇشىرىلعان بولاتىن. ول “ۆەنەرا-8” اپپاراتىمەن بىردەي كونسترۋكتسيادا جاسالعان. الايدا كۇشەيتكىش قوندىرعىنىڭ دۇرىس ىستەمەۋىنە بايلانىستى اپپارات ۆەنەراعا جەتە الماي، جەردىڭ جوعارى ەلليپتيكالىق وربيتاسىندا قالىپ قويعان. سودان بەرى ول بىرتىندەپ جەرگە جاقىنداپ، وربيتادان شىقتى.
عالىمدار بۇل قۇبىلىستىڭ ەشقانداي قاۋىپ تۋدىرماعانىن جانە باقىلاۋدا بولعانىن اتاپ ءوتتى.
ۇقساس جاڭالىقتار
