اقمولا وبلىسى - تۋريستەرگە قولايلى ينفراقۇرىلىم جاساقتاۋدا

اقمولا وبلىسى – ەلدەگى جەتەكشى تۋريستىك باعىتتاردىڭ بىرىنە اينالىپ كەلەدى. 2024 جىلدىڭ قورىتىندىسى بويىنشا وڭىرگە 1 ميلليوننان استام تۋريست كەلگەن. بۇل – وتكەن جىلمەن سالىستىرعاندا 3%-عا ارتىق كورسەتكىش. ونىڭ ىشىندە 577 مىڭعا جۋىق ادام ۇلتتىق پاركتەردى ارالاسا، 420 مىڭنان استام تۋريست قوناق ۇيلەر مەن دەمالىس بازالارىندا توقتاعان. وبلىستىڭ باستى تۋريستىك ايماعى – بۇرىنعىسىنشا ششۋچە-بۋراباي كۋرورتتىق ايماعى. مۇندا وڭىردەگى بارلىق تۋريستىك بەلسەندىلىكتىڭ 90%-ى شوعىرلانعان. تەك بىلتىرعى جىلدىڭ وزىندە بۋراباي اۋدانىنداعى كورسەتىلگەن قىزمەت كولەمى 113%-عا ءوسىپ، 18,9 ملرد تەڭگەنى قۇرادى. كۋرورتتىق ايماق بەلسەندى دامۋدا: جولدار سالىنىپ، ينجەنەرلىك جەلىلەر جاڭارتىلىپ، جاڭا قوناق ۇيلەر مەن ويىن-ساۋىق نىساندارى اشىلۋدا. ششبكا-نى 2029 جىلعا دەيىن دامىتۋعا ارنالعان كەشەندى جوسپار اياسىندا جالپى سوماسى 137 ملرد تەڭگەدەن اساتىن 118 ءىس-شارانى جۇزەگە اسىرۋ كوزدەلگەن. باستى باسىمدىقتاردىڭ قاتارىندا – ساپالى سۋمەن جابدىقتاۋ مەن سۋ تارتۋ جۇيەسىن جاقسارتۋ، كوشە-جول جەلىسىن قايتا قۇرۋ، كوپفۋنكتسيونالدى كونگرەسس-ورتالىق سالۋ، جاعاجايلاردى اباتتاندىرۋ جانە «اقبۋرا»، قاتاركول مەن جۇكەي كولدەرى سياقتى جاڭا تۋريستىك لوكاتسيالاردى دامىتۋ بار. سونىمەن قاتار، ششۋچە دەندرولوگيالىق ساياباعىن جاڭعىرتۋ جۇمىستارى باستالىپ كەتتى. بۇل اۋماق ەكوتۋريزمنىڭ جاڭا ورتالىعىنا اينالۋى ءتيىس. ءوڭىردىڭ ينۆەستيتسيالىق تارتىمدىلىعىنا دا ەرەكشە نازار اۋدارىلۋدا. 2024 جىلى كۋرورتتىق ايماقتا 3 ملرد تەڭگەگە جۋىق قاراجاتقا 5 ءىرى جوبا جۇزەگە اسىرىلدى. ولاردىڭ قاتارىندا – ششۋچە كولىنىڭ جاعالاۋىنداعى بۋتيك-قوناق ءۇي، «Altay Resort» سەكىلدى تانىمال نىسانداردى قايتا جوندەۋ جانە جاڭا دەمالىس ايماقتارىن سالۋ بار. قازىر «Wyndham» مەن «Hilton» سياقتى حالىقارالىق قوناق ءۇي جەلىلەرىنىڭ جوبالارى جۇزەگە اسىرىلۋ ۇستىندە. استانالىق اگلومەراتسياعا جاقىن تۋريستىك كلاستەر دە دامىپ كەلەدى. جاقىندا باسىم اۋماقتار قاتارىنا ەنگەن اقكول اۋدانىنا بۇگىندە 4,5 ملرد تەڭگەدەن استام جەكە ينۆەستيتسيا تارتىلعان. مۇندا ەلىمىزدە ءداستۇرلى كۋرورتتاردان تىس ايماقتاعى العاشقى حالىقارالىق دەڭگەيدەگى قوناق ءۇي — Wyndham Residences Aqkol اشىلدى. جاقىن جىلدارى كوتتەدج قالاشىعى، SPA-كەشەنى مەن Ramada كۋرورتى سىندى بىرنەشە جاڭا نىساننىڭ قۇرىلىسى جوسپارلانۋدا. ءتۋريزمنىڭ الەۋەتى زەرەندى، ءبىرجان سال جانە ساندىقتاۋ اۋداندارىندا دا قارقىندى اشىلۋدا. بۇل ايماقتاردا شاعىن جانە ورتا بيزنەستى قولداۋ، مەملەكەتتىك قولداۋ شارالارىن ەنگىزۋ، جاڭا تۋريستىك باعىتتار مەن دەمالىس بازالارىن اشۋ قولعا الىنعان. دەگەنمەن، كەيبىر وڭىرلەردە شەشىمىن كۇتكەن ماسەلەلەر دە بار: مىسالى، ساندىقتاۋ اۋدانىندا جول ينفراقۇرىلىمىن جاڭارتۋ قاجەت. وڭىرلىك لوگيستيكا دا دامىپ كەلەدى. 2025 جىلى كوكشەتاۋ — قىزىلوردا باعىتىنداعى جاڭا اۋە رەيسى اشىلادى، «كۋرورت-بۋراباي» تەمىرجول ستانتسياسى جاڭعىرتىلادى، جاز مەزگىلىندە تىكۇشاقپەن شولۋ ەكسكۋرسيالارى ىسكە قوسىلادى. تۋريستەردىڭ قاۋىپسىزدىگى مەن جايلىلىعى دا باستى نازاردا. بيىل 79 بەينەباقىلاۋ كامەراسى ورناتىلادى، سونداي-اق ەكى سۋ-قۇتقارۋ ستانتسياسىنىڭ قۇرىلىسى اياقتالادى. تسيفرلاندىرۋ باعىتىندا دا جۇمىس جۇرگىزىلۋدە: 7 جاڭا ۇيالى بايلانىس مۇناراسى ورناتىلىپ، ءموبيلدى ينتەرنەتتىڭ ساپاسى جاقسارۋدا. ەكولوگيا — تاعى ءبىر ماڭىزدى باسىمدىق. بۋراباي اۋدانىندا قالدىقتاردى بولەك جيناۋ جانە وڭدەۋ جۇيەسىن قامتاماسىز ەتەتىن قوقىس وڭدەۋ كەشەنىنىڭ قۇرىلىسى باستالدى. جوبا مەملەكەتتىك-جەكەمەنشىك ارىپتەستىك مەحانيزمى ارقىلى جۇزەگە اسىرىلۋدا. ينفراقۇرىلىمدىق جوبالارمەن قاتار، وقيعالى تۋريزم دە دامىپ كەلەدى. 2025 جىلى وڭىردە 25 ءىرى ءىس-شارا وتكىزۋ جوسپارلانعان، ولاردىڭ قاتارىندا حالىقارالىق جانە رەسپۋبليكالىق دەڭگەيدەگى جوبالار بار. بۇل شارالارعا 30 مىڭنان استام ادام قاتىسادى دەپ كۇتىلۋدە. اقمولا وبلىسى ءتۋريزمدى ورنىقتى دامىتۋ باعىتىن بەرىك ۇستانعان. ءوڭىر دامۋ باعىتىن ايقىن ايقىنداپ وتىر: جايلىلىق، قاۋىپسىزدىك، ينۆەستيتسيالىق تارتىمدىلىق، تسيفرلاندىرۋ جانە ەكولوگيالىق تۇراقتىلىق. بۇل – وڭىرگە كەلگەن ءاربىر ءتۋريستىڭ قايتا ورالعىسى كەلۋى ءۇشىن جاسالىپ جاتقان جۇيەلى جۇمىستار.