ماسكەۋدە پرەزيدەنت قاسىم-جومارت توقاەۆ ۆەنەسۋەلا باسشىسى نيكولاس مادۋرومەن كەزدەسۋ وتكىزدى. بۇل تۋرالى بۇگىن، 8 مامىردا اقوردانىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
مەملەكەت باسشىسى مارتەبەلى مەيمانعا ءىلتيپات ءبىلدىرىپ، ەلىمىزدىڭ ۇلى جەڭىسكە قوسقان ۇلەسى جايىندا ايتتى. پرەزيدەنت قازاقستاننان مايدانعا 1,2 ميلليون ادام اتتانىپ، ولاردىڭ جارتىسى ەرلىكپەن قازا تاپقانىن جەتكىزدى.
قاسىم-جومارت توقاەۆ ۆەنەسۋەلانى ەلىمىزدىڭ ماڭىزدى سەرىكتەسى رەتىندە قاراستىراتىنىن اتاپ ءوتتى. سونىمەن قاتار بەلگىلى سەبەپتەرگە بايلانىستى وسى ۋاقىتقا دەيىن ەكىجاقتى ىنتىماقتاستىق ويداعىداي ورىستەمەگەنىنە نازار اۋداردى.
وسى ورايدا نيكولاس مادۋرونى ءوزارا ىقپالداستىقتى تالقىلاۋ ءۇشىن قازاقستانعا مەملەكەتتىك ساپارمەن كەلۋگە شاقىردى.
ۆەنەسۋەلا پرەزيدەنتى ەكى ەل اراسىنداعى بايلانىستاردىڭ جاي-كۇيىن پىسىقتاۋعا مۇمكىندىك تۋعانىنا قۋانىشتى ەكەنىن جەتكىزدى. ونىڭ ايتۋىنشا، ۇلى جەڭىستىڭ 80 جىلدىعىن مەرەكەلەۋدىڭ جاھاندىق ماڭىزى زور. نيكولاس مادۋرو كەڭەس وداعىنىڭ قۇرامىندا بولعان حالىقتار جەڭىسكە جەتۋ جولىندا نەگىزگى ءرول اتقارعانىنا توقتالدى.
اڭگىمەلەسۋ بارىسىندا ەكونوميكالىق قارىم-قاتىناستى دامىتۋعا، سونىڭ ىشىندە ەنەرگەتيكا سالاسىنداعى ىنتىماقتاستىققا ءمان بەرىلدى.
كەزدەسۋ قورىتىندىسى بويىنشا ساۋدا-ساتتىقتى جانداندىرۋ ماقساتىندا ەكسپورتقا لايىق ونىمدەردىڭ تىزبەسىن ازىرلەۋ جانە ءوزارا الماسۋ، ەكى ەلدىڭ ىسكەرلىك ورتالارى اراسىندا ناقتى ىقپالداستىق ورناتۋ جونىندەگى ۋاعدالاستىققا قول جەتكىزىلدى.
