Mäskeude prezident Qasym-Jomart Toqaev Venesuela basşysy Nikolas Maduromen kezdesu ötkızdı. Būl turaly bügın, 8 mamyrda Aqordanyŋ baspasöz qyzmetı aitty, dep habarlaidy «Adyrna» tılşısı.
Memleket basşysy märtebelı meimanǧa ıltipat bıldırıp, elımızdıŋ Ūly Jeŋıske qosqan ülesı jaiynda aitty. Prezident Qazaqstannan maidanǧa 1,2 million adam attanyp, olardyŋ jartysy erlıkpen qaza tapqanyn jetkızdı.
Qasym-Jomart Toqaev Venesuelany elımızdıŋ maŋyzdy serıktesı retınde qarastyratynyn atap öttı. Sonymen qatar belgılı sebepterge bailanysty osy uaqytqa deiın ekıjaqty yntymaqtastyq oidaǧydai örıstemegenıne nazar audardy.
Osy oraida Nikolas Madurony özara yqpaldastyqty talqylau üşın Qazaqstanǧa memlekettık saparmen keluge şaqyrdy.
Venesuela prezidentı ekı el arasyndaǧy bailanystardyŋ jai-küiın pysyqtauǧa mümkındık tuǧanyna quanyşty ekenın jetkızdı. Onyŋ aituynşa, Ūly Jeŋıstıŋ 80 jyldyǧyn merekeleudıŋ jahandyq maŋyzy zor. Nikolas Maduro Keŋes Odaǧynyŋ qūramynda bolǧan halyqtar Jeŋıske jetu jolynda negızgı röl atqarǧanyna toqtaldy.
Äŋgımelesu barysynda ekonomikalyq qarym-qatynasty damytuǧa, sonyŋ ışınde energetika salasyndaǧy yntymaqtastyqqa män berıldı.
Kezdesu qorytyndysy boiynşa sauda-sattyqty jandandyru maqsatynda eksportqa laiyq önımderdıŋ tızbesın äzırleu jäne özara almasu, ekı eldıŋ ıskerlık ortalary arasynda naqty yqpaldastyq ornatu jönındegı uaǧdalastyqqa qol jetkızıldı.
