ۇلى جەڭىستىڭ 80 جىلدىق مەرەيتويى قارساڭىندا ەرەيمەنتاۋ اۋدانىندا ەرەكشە تاعزىم مەن العىسقا تولى ءىس-شارا ءوتتى. «جەڭىستىڭ رۋحى بيىك، داڭقى ماڭگى» اتتى شارا اياسىندا تىل ەڭبەككەرلەرى مەن ۇلى وتان سوعىسى ارداگەرلەرىنىڭ جەسىرلەرىنە مەرەيتويلىق مەدالدار مەن ەستەلىك سىيلىقتار تابىس ەتىلدى.
بۇل — تەك ماراپات ەمەس. بۇل — وتكەنگە دەگەن تاعزىم، ەل ءۇشىن تەر توككەندەردىڭ ەڭبەگىنە بەرىلگەن شىنايى قۇرمەت. جينالعانداردىڭ جۇزىندە تولقىنىس، كوزدەرىندە ساعىنىش پەن ماقتانىش سەزىمى قاتار كورىندى.
ءىس-شاراعا اۋدان باسشىلىعى قاتىسىپ، ۇلى جەڭىس كۇنىمەن شىن جۇرەكتەن قۇتتىقتاپ، بەيبىت اسپان مەن تىنىش ءومىر ءۇشىن زور العىستارىن ءبىلدىردى. ولار ارداگەرلەردىڭ ەرەن ەڭبەگى مەن مايداندا قازا تاپقان بوزداقتاردىڭ رۋحىنا تاعزىم ەتتى. اۋدان اكىمى ارداگەرلەر جەسىرلەرىنە قاراپ: "سىزدەردىڭ توزىمدەرىڭىز بەن تاباندىلىقتارىڭىز – بۇگىنگى ۇرپاققا ۇلگى. جەڭىستىڭ ءاربىر ءساتى – سىزدەردىڭ قاجىر-قايراتتارىڭىزبەن كەلگەن", – دەپ جۇرەكجاردى لەبىزىن جەتكىزدى.
ايتا كەتەيىك، ماراپاتتار مەن مەدالدار مەملەكەت باسشىسى قاسىم-جومارت توقاەۆتىڭ اتىنان تابىستالدى. بۇل — پرەزيدەنتتىڭ ەل تاريحىنداعى باتىر انالار مەن ارداقتى ەڭبەك ادامدارىنا دەگەن قۇرمەتىنىڭ بەلگىسى.
ءىس-شارا بارىسىندا 20-دان استام تىل ارداگەرى مەن ارداگەرلەردىڭ جەسىرلەرى ارنايى قۇرمەتكە يە بولدى. ولار ءۇشىن بۇل كۇن – جاي عانا ەسكە الۋ كۇنى ەمەس، جۇرەكتەرىندەگى ساعىنىش پەن ماقتانىشقا تولى ەرەكشە ساتكە اينالدى.
ولاردىڭ ءومىر جولى – وشپەس ەرلىك پەن ءتوزىمنىڭ ايعاعى. وسىنداي كەزدەسۋلەر ارقىلى ۇرپاقتار ساباقتاستىعى نىعايىپ، جەڭىس رۋحى جۇرەكتەردە ماڭگىلىككە ساقتالادى.
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز