استانا قالاسىنىڭ اكىمدىگى تىل ەڭبەككەرى، پروفەسسور تەڭدىك يزاقوۆتان 7 مامىر كۇنى وتكەن اسكەري شەرۋ كەزىندە ورىن العان جاعداي ءۇشىن كەشىرىم سۇرادى، دەپ حابارلايدى "ادىرنا" ۇلتتىق پورتالى.
قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب پەن ىشكى ساياسات باسقارماسىنىڭ باسشىسى نۇرداۋلەت ءالمۇحانوۆ تەڭدىك يزاقوۆپەن جانە ونىڭ وتباسىمەن ارنايى كەزدەسىپ، كوپ جىلعى ەڭبەگى ءۇشىن العىس ءبىلدىرىپ، شەرۋ وتەتىن اۋماققا كىرگىزىلمەگەنى ءۇشىن كەشىرىم سۇرادى.
رەسمي مالىمەتكە سايكەس، ءىس-شارا اۋماعىنا كىرۋ ارنايى ازىرلەنگەن ءتىزىم بويىنشا جۇزەگە اسىرىلعان. بۇل ءتىزىم شەكتەۋلى ورىن سانى مەن ارداگەرلەردىڭ جاسى ۇلعايعانىن ەسكەرە وتىرىپ، تەك تىل ەڭبەككەرلەرى مەن ارداگەرلەردىڭ تۋىستارىنىڭ وتىنىشتەرى نەگىزىندە دايىندالعان. تەڭدىك يزاقوۆتىڭ وتباسىنان مۇنداي ءوتىنىش كەلىپ تۇسپەگەن.
اكىمدىك تۋىنداعان جاعدايعا بايلانىستى ارداگەر مەن ونىڭ جاقىندارىنان شىن جۇرەكتەن كەشىرىم سۇراپ، 9 مامىر كۇنى وتەتىن گۇل شوقتارىن قويۋ راسىمىنە ارنايى شاقىردى.
ايتا كەتەيىك، 7 مامىردا ەلىمىزدىڭ بارلىق وڭىرىنەن ارداگەرلەر مەن تىل ەڭبەككەرلەرى اسكەري شەرۋ ءىس-شاراسىنا قاتىسقان بولاتىن.
الايدا الەۋمەتتىك جەلىدە ارداگەردىڭ پارادقا كىرگىزىلمەگەنى تۋرالى ۆيدەو تاراعان.
ۇقساس جاڭالىقتار
