استاناداعى سارىارقا اۋدانىندا ورنالاسقان «شاپاعات» بازارىندا ءورت شىقتى، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
ءورت تۋرالى بەينەجازبالار الدىمەن الەۋمەتتىك جەلىدە تارادى. اتالعان فاكتى بويىنشا توتەنشە جاعدايلار مينيسترلىگى رەسمي مالىمدەمە جاسادى. ۆەدومستۆونىڭ حابارلاۋىنشا، ەلوردالىق ءورت سوندىرۋشىلەر دۇڭگىرشەكتەردىڭ بىرىندە تۇتانعان وتتى ءسوندىرۋ جۇمىستارىن جۇرگىزىپ جاتىر.
«ءورت بولعان جەردە كۇشتەر مەن قۇرالدار جوعارى دايىندىقپەن جۇمىلدىرىلىپ، جالىندى اۋىزدىقتاۋ جۇمىستارى ءجۇرىپ جاتىر. قازىرگى ۋاقىتتا ءورتتىڭ شىعۋ سەبەبى مەن تولىق ءمان-جايى انىقتالۋدا»، – دەپ مالىمدەدى تجم.قۇتقارۋشىلار بازار ماڭىنداعى ادامداردى ەۆاكۋاتسيالاپ جاتىر. سوڭعى مالىمەت بويىنشا، «112» قىزمەتىنە زارداپ شەككەندەر تۋرالى اقپارات كەلىپ تۇسپەگەن. ايتا كەتەيىك، بۇعان دەيىن دە استانادا بىرنەشە ءورت وقيعاسى تىركەلگەن. جاقىندا عانا پلاستيك قالدىقتارى ساقتالعان قويمادا ءورت شىقسا، ودان بولەك ەكى جۇك كولىگى سوقتىعىسىپ، سونىڭ سالدارىنان ورتەنىپ كەتكەنى حابارلانعان ەدى.
ۇقساس جاڭالىقتار
