مال شارۋاشىلىعىن دامىتۋ: اقمولا وبلىسىندا ءسۇت ءوندىرىسى قارقىندى ءوسىپ كەلەدى

اقمولا وبلىسىندا ءسۇت باعىتىنداعى مال شارۋاشىلىعى ەكپىندى تۇردە دامىپ جاتىر. سوڭعى ءبىر جارىم جىلدا وڭىردە بەس بىردەي زاماناۋي ءسۇت-تاۋار فەرماسى سالىنىپ، ىسكە قوسىلدى. جىل سوڭىنا دەيىن تاعى بەس فەرما پايدالانۋعا بەرىلەدى دەپ كۇتىلۋدە. بۇل سەرپىندى قادام وڭىردەگى ءسۇت ءوندىرىسىن ەكى ەسەگە جۋىق ارتتىرۋعا جانە قايتا وڭدەۋ سالاسىنىڭ الەۋەتىن نىعايتۋعا مۇمكىندىك بەرەدى. وتكەن جىلدان باستاپ وبلىستا اۋقىمدى ينۆەستيتسيالىق جوبالار جۇزەگە اسىرىلۋدا. جەڭىلدەتىلگەن نەسيەلەندىرۋ اياسىندا جەتى جاڭا ءسۇت-تاۋار فەرماسىن سالۋعا 15 ميلليارد تەڭگە باعىتتالدى. بۇگىندە 5 ءىرى فەرما ىسكە قوسىلدى. ولارداعى ءىرى قارا مال باسى – 5,4 مىڭ. ماسەلەن، تسەلينوگراد اۋدانىندا 1100 جانە 2000 باسقا ارنالعان «اف رودينا» مەن «ەن دالا» جشس كەشەندەرى جۇمىس ىستەپ تۇر. ارشالى اۋدانىندا – «TemirAgro» جشس، اقكول اۋدانىندا – «ەڭبەك» جشس، ال جارقايىڭ اۋدانىندا – «تەمىرلان» جشس ىسكە قوسىلدى. «بيىل دا بۇل باعىتتاعى جۇمىستار جالعاسىن تابۋدا. وبلىستىڭ بىرنەشە اۋدانىندا 4400 باسقا ارنالعان تاعى بەس ءسۇت فەرماسىن ىسكە قوسۋ جوسپارلانىپ وتىر. ولاردىڭ قاتارىندا اتباسار اۋدانىنداعى «باستاۋ» جشس، زەرەندى اۋدانىنداعى «Agro Milk Project» پەن «جاقسىلىق اگرو»، بۋرابايداعى «Burabay Milk» جانە شورتاندىداعى «نۇراستىق KZ» جوبالارى بار»، – دەپ حابارلادى وبلىستىق اۋىل شارۋاشىلىعى باسقارماسى. اتالعان جوبالاردىڭ بارلىعى تولىق قۋاتىندا جۇمىس ىستەگەن كەزدە وڭىردەگى تاۋارلى ءسۇت ءوندىرىسى جىلىنا 70 مىڭ توننادان استامعا ارتادى. بۇل – الدىڭعى جىلدارمەن سالىستىرعاندا شامامەن ەكى ەسەگە كوپ. ءسۇت وندىرىسىمەن قاتار وبلىستاعى قايتا وڭدەۋ سالاسى دا دامۋ ۇستىندە. قازىرگى تاڭدا اقمولا وبلىسىندا 67 قايتا وڭدەۋ كاسىپورنى جۇمىس ىستەيدى. ولاردىڭ قاتارىندا ەت كومبيناتتارى، ءسۇت زاۋىتتارى، ۇن تارتۋ كاسىپورىندارى مەن مايلى داقىلداردى وڭدەۋشى زاۋىتتار بار. وتكەن جىلدىڭ قورىتىندىسى بويىنشا ەت وڭدەۋ كولەمى 78,4 پايىزعا جەتىپ، 2023 جىلمەن سالىستىرعاندا ايتارلىقتاي وسكەنى بايقالدى. ال ءسۇت وڭدەۋ ۇلەسى 86,7 پايىزعا جەتكەن. بۇل – مەملەكەت باسشىسىنىڭ اۋىل شارۋاشىلىعى ونىمدەرىن قايتا وڭدەۋ ۇلەسىن 70 پايىزعا جەتكىزۋ جونىندەگى تاپسىرماسىن ورىنداۋ اياسىندا اتقارىلعان جۇيەلى جۇمىستاردىڭ ناتيجەسى.