Mal şaruaşylyǧyn damytu: Aqmola oblysynda süt öndırısı qarqyndy ösıp keledı

Aqmola oblysynda süt baǧytyndaǧy mal şaruaşylyǧy ekpındı türde damyp jatyr. Soŋǧy bır jarym jylda öŋırde bes bırdei zamanaui süt-tauar fermasy salynyp, ıske qosyldy. Jyl soŋyna deiın taǧy bes ferma paidalanuǧa berıledı dep kütılude. Būl serpındı qadam öŋırdegı süt öndırısın ekı esege juyq arttyruǧa jäne qaita öŋdeu salasynyŋ äleuetın nyǧaituǧa mümkındık beredı. Ötken jyldan bastap oblysta auqymdy investisiialyq jobalar jüzege asyryluda. Jeŋıldetılgen nesielendıru aiasynda jetı jaŋa süt-tauar fermasyn saluǧa 15 milliard teŋge baǧyttaldy. Bügınde 5 ırı ferma ıske qosyldy. Olardaǧy ırı qara mal basy – 5,4 myŋ. Mäselen, Selinograd audanynda 1100 jäne 2000 basqa arnalǧan «AF Rodina» men «En Dala» JŞS keşenderı jūmys ıstep tūr. Arşaly audanynda – «TemirAgro» JŞS, Aqköl audanynda – «Eŋbek» JŞS, al Jarqaiyŋ audanynda – «Temırlan» JŞS ıske qosyldy. «Biyl da būl baǧyttaǧy jūmystar jalǧasyn tabuda. Oblystyŋ bırneşe audanynda 4400 basqa arnalǧan taǧy bes süt fermasyn ıske qosu josparlanyp otyr. Olardyŋ qatarynda Atbasar audanyndaǧy «Bastau» JŞS, Zerendı audanyndaǧy «Agro Milk Project» pen «Jaqsylyq Agro», Burabaidaǧy «Burabay Milk» jäne Şortandydaǧy «NūrAstyq KZ» jobalary bar», – dep habarlady oblystyq auyl şaruaşylyǧy basqarmasy. Atalǧan jobalardyŋ barlyǧy tolyq quatynda jūmys ıstegen kezde öŋırdegı tauarly süt öndırısı jylyna 70 myŋ tonnadan astamǧa artady. Būl – aldyŋǧy jyldarmen salystyrǧanda şamamen ekı esege köp. Süt öndırısımen qatar oblystaǧy qaita öŋdeu salasy da damu üstınde. Qazırgı taŋda Aqmola oblysynda 67 qaita öŋdeu käsıporny jūmys ısteidı. Olardyŋ qatarynda et kombinattary, süt zauyttary, ūn tartu käsıporyndary men maily daqyldardy öŋdeuşı zauyttar bar. Ötken jyldyŋ qorytyndysy boiynşa et öŋdeu kölemı 78,4 paiyzǧa jetıp, 2023 jylmen salystyrǧanda aitarlyqtai öskenı baiqaldy. Al süt öŋdeu ülesı 86,7 paiyzǧa jetken. Būl – Memleket basşysynyŋ auyl şaruaşylyǧy önımderın qaita öŋdeu ülesın 70 paiyzǧa jetkızu jönındegı tapsyrmasyn oryndau aiasynda atqarylǧan jüielı jūmystardyŋ nätijesı.