گرانيتنوە اۋىلىنداعى ساربازدار زياتكەرلىك سايىستا سىنعا ءتۇستى

زەرەندى اۋدانىنا قاراستى گرانيتنوە اۋىلىنداعى 55/10 اسكەري بولىمىندە وتان قورعاۋشى كۇنىنە ارنالعان ءداستۇرلى ساپتىق شەرۋ عانا ەمەس، ناعىز اقىل-وي دوداسىنا اينالدى. قازىردىڭ وزىندە كازارما ءىشى قىزۋ دايىندىق الاڭىنا اينالىپ، ساربازدار الداعى زياتكەرلىك ويىنعا بەلسەندى كىرىسىپ كەتتى. بۇل ەرەكشە شارانى اقمولا وبلىستىق ىشكى ساياسات باسقارماسىنىڭ «جاستار رەسۋرستىق ورتالىعى» ۇيىمداستىرىپ وتىر. ويىندا 60-تان استام سارباز باق سىناماق. ولار 3 ادامنان قۇرالعان 20 كومانداعا ءبولىنىپ، بەس ءتۇرلى باعىت بويىنشا بىلىمدەرىن ساراپقا سالادى. بۇل تەك سۇراق-جاۋاپ سايىسى ەمەس، ويلاۋ قابىلەتىن، تاپقىرلىقتى، ەرۋديتسيانى تالاپ ەتەتىن شىنايى ينتەللەكتۋالدى شايقاس بولعالى تۇر. زياتكەرلىك ويىن بەس باعىتتان تۇردى: «تاريح تاعىلىمى» ،«ءان الەمى» ، «ۇلى تۇلعا تۋرالى»، «كينو الەمى»، «1+1=3». «ءبىزدىڭ ماقساتىمىز – ساربازداردىڭ بويىنداعى ستراتەگيالىق ويلاۋ مەن تانىمدىق قابىلەتتى وياتۋ. قازىرگى زاماندا جاۋىنگەر تەك كۇشتى عانا ەمەس، ءبىلىمدى، ويلى بولۋعا ءتيىس. بۇل ويىن – سول قابىلەتتەردى دامىتۋعا باعىتتالعان»، – دەيدى ۇيىمداستىرۋشىلار. كازارمادا قازىردىڭ وزىندە ەرەكشە رۋح قالىپتاسقان. ساربازدار ۆيكتورينالاردى قايتالاپ، ەكىنشى دۇنيەجۇزىلىك سوعىستىڭ ماڭىزدى وقيعالارىن ەسكە ءتۇسىرىپ، ەنتسيكلوپەديالار پاراقتاپ، سۇيىكتى فيلمدەر مەن تاريحي تۇلعالار جايلى پىكىرتالاسقا تۇسۋدە. بۇل شىنايى ينتەللەكتۋالدى دايىندىقتىڭ كورىنىسى. ۇيىمداستىرۋشىلاردىڭ ايتۋىنشا، جۇلدە الماي قالعان كوماندالار دا ۇتىلمايدى ولار شابىت، جاعىمدى ەموتسيا مەن جاڭا بىلىممەن قارۋلانىپ قايتادى. ال جەڭىمپازدارعا ەستەلىك سىيلىقتار تابىستالادى. بۇل سىيلىقتار – ولاردىڭ ينتەللەكتۋالدىق جەڭىسىنىڭ سيمۆولى بولماق. مۇنداي فورماتتاعى شارالار وتان قورعاۋشىلار كۇنىن اتاپ ءوتۋدىڭ جاڭاشا ۇلگىسىنە اينالىپ كەلەدى. قاتار تۇزەپ، ساپپەن جۇرەتىن ساربازدار ەندى ويمەن دە ساپ تۇزەي باستادى. بۇل اسكەر تەك ءتارتىپ پەن جارعى عانا ەمەس، جان-جاقتى دامىعان جەكە تۇلعالاردىڭ ورداسى ەكەنىن ايعاقتايتىن جاقسى مىسال.