اقمولا وبلىسىندا مادەني نىساندار جاڭارىپ جاتىر: ونداعان جوبا جۇزەگە اسۋدا

اقمولا وبلىسىندا الەۋمەتتىك ينفراقۇرىلىمدى دامىتۋ باعىتىنداعى جۇمىستار جۇيەلى جالعاسۋدا. 2025 جىلى ءوڭىر ءۇشىن ماڭىزدى باسىمدىقتاردىڭ ءبىرى مادەنيەت نىساندارىن سالۋ مەن جاڭارتۋ بولدى. وسى ماقساتتارعا رەسپۋبليكالىق، جەرگىلىكتى جانە ۇلتتىق قورلاردان جالپى كولەمى 3,7 ملرد تەڭگەدەن استام قاراجات ءبولىندى. جوبالار تەك اۋدان ورتالىقتارىن عانا ەمەس، شالعاي اۋىلداردى دا قامتيدى. ەڭ اۋقىمدى جوبالار جاڭا قۇرىلىس باعىتىندا جۇرگىزىلۋدە. قازىرگى تاڭدا 12 نىساننىڭ قۇرىلىسى ءجۇرىپ جاتىر. ولاردىڭ قاتارىندا مادەنيەت ۇيلەرى، كلۋبتار، بوس ۋاقىت وتكىزۋ ورتالىقتارى مەن مۋزەيلەر بار. ماسەلەن، ششۋچە قالاسىندا 400 ورىندىق اۋداندىق مادەنيەت ءۇيىنىڭ قۇرىلىسى اياقتالۋعا جاقىن. وبلىستىق مادەنيەت باسقارماسىنىڭ مالىمەتىنشە، بۇل نىسان مامىر ايىنىڭ سوڭىنا دەيىن پايدالانۋعا بەرىلەدى. ارشالى اۋىلىندا 300 ورىندىق مادەنيەت ءۇيى سالىنىپ جاتىر. قۇرىلىستى وبلىس اكىمى تىكەلەي باقىلاۋىنا العان، ال اياقتاۋ مەرزىمى 1 قىركۇيەك دەپ بەلگىلەنگەن. ۇقساس جوبالار ارشالى اۋدانىنداعى جىبەك جولى اۋىلىندا دا جۇزەگە اسىرىلۋدا. مۇندا ءىرى مادەني ورتالىقتىڭ قۇرىلىسى ماۋسىم ايىندا ءتامامدالۋى ءتيىس. بۇل نىسانداردى جەتىسۋ مەن باتىس قازاقستان وبلىستارىنان كەلگەن قۇرىلىس كومپانيالارى سالىپ جاتىر. زەرەندى اۋىلىندا سالىنىپ جاتقان مۋزەي-كرەاتيۆتى حاب ەرەكشە نازار اۋدارادى. بۇل جاي عانا كورمە زالى ەمەس، شىعارماشىلىق پەن مادەني باستامالاردى دامىتۋعا ارنالعان زاماناۋي كەڭىستىك. قۇرىلىس جۇمىستارى باستالىپ كەتتى، تولىق اياقتالۋ مەرزىمى 2026 جىل. سونداي-اق بۋلاندى، اقكول، بۋراباي، استراحان اۋداندارىندا دا مادەنيەت وشاقتارىنىڭ قۇرىلىسى قارقىندى ءجۇرىپ جاتىر. مىسالى، نيكولسكوە اۋىلىنداعى مادەنيەت ءۇيىنىڭ قۇرىلىسى 60 پايىز اياقتالعان. ال كاتاركول، كەنەسارى، قارابۇلاق اۋىلدارىندا دا جۇمىس بەلسەندى تۇردە جالعاسۋدا. كۇردەلى جانە اعىمداعى جوندەۋ جۇمىستارى دا ماڭىزدى باعىتتاردىڭ ءبىرى. اتاپ ايتقاندا، جولىمبەت، ۇرىمقاي، سابىندى، جاڭاەسىل اۋىلدارىنداعى مادەنيەت ۇيلەرى جاڭارتىلىپ جاتىر. ەسىل اۋدانىنداعى جوندەۋ جۇمىستارى تولىق اياقتالسا، ارشالى اۋدانىنداعى انار اۋىلىنىڭ كلۋبى مامىر ايىندا اياقتالۋعا جاقىن. سونىمەن قاتار، بۇلاندى اۋدانىنىڭ قاراوزەك اۋىلىندا ورنالاسقان مادەنيەت ۇيىندە رەكونسترۋكتسيا جۇمىستارى باستالدى. قازىرگى تاڭدا بۇل جەردە بۇزۋ جۇمىستارى جۇرگىزىلۋدە. بارلىق جوبالار رەسپۋبليكالىق بيۋدجەت، ۇلتتىق قور جانە جەرگىلىكتى بيۋدجەت ەسەبىنەن قارجىلاندىرىلۋدا. كوپتەگەن نىساندار 2025 جىلدىڭ سوڭىنا دەيىن تاپسىرىلادى، ال كەيبىرى 2026 جىلعا جوسپارلانعان. وسىلايشا، اقمولا وبلىسىنىڭ مادەني كارتاسى قارقىندى وزگەرۋدە. جاڭادان بوي كوتەرگەن مادەني مەكەمەلەر تۇرعىندار ءۇشىن شىعارماشىلىقپەن اينالىسۋعا، دەمالۋعا، بىرلەسىپ جۇمىس ىستەۋگە جانە ءوزارا بايلانىس ورناتۋعا ۇلكەن مۇمكىندىك بەرەدى. بۇل تەك ينفراقۇرىلىمدىق دامۋعا عانا ەمەس، سونىمەن قاتار ۇلتتىق بىرەگەيلىكتى ساقتاۋ، ءپاتريوتيزمدى كۇشەيتۋ مەن ءومىر ساپاسىن ارتتىرۋعا دا زور ۇلەس قوسادى.