پرەزيدەنت ۆەتنام ەلىنىڭ باسشىسى تو لاممەن كەلىسسوز جۇرگىزدى

قازاقستان پرەزيدەنتى قاسىم-جومارت توقاەۆ ۆەتنام كوممۋنيستىك پارتياسى ورتالىق كوميتەتى باس حاتشىسى شاعىن قۇرامدا تو لاممەن كەلىسسوز جۇرگىزدى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى. پرەزيدەنت ۆەتنام كوممۋنيستىك پارتياسى ورتالىق كوميتەتى باس حاتشىسىنىڭ قازاقستانعا العاش رەت ساپارلاپ كەلگەنىن، بۇل قادامدى ەكى ەل اراسىنداعى مىزعىماس دوستىقتىڭ ايعاعى دەپ باعالاعان. «ۆەتنام – قازاقستاننىڭ ازياداعى ماڭىزدى سەرىكتەسى. ءبىزدىڭ ءوسىپ-وركەندەۋ جولىنداعى مۇددەمىز – ورتاق. مەن ەكى جىل بۇرىن ۆەتنامعا رەسمي ساپارمەن باردىم. سوندا ەكىجاقتى ىقپالداستىقتىڭ جاڭا باعىتتارىن دامىتۋعا ۋاعدالاستىق. كەلەسى ايدا ەكى ەل اراسىنداعى ديپلوماتيالىق قاتىناستىڭ ورناعانىنا 33 جىل تولادى. الداعى ۋاقىتتا دا قوس حالىقتىڭ دوستىعى نىعايا بەرمەك. مەن بۇعان كامىل سەنەمىن. ءبىز ورتاق ماقسات-مىندەتتەرگە جەتۋ ءۇشىن كۇش جۇمىلدىرۋعا ءاردايىم دايىنبىز»، – دەدى قاسىم-جومارت توقاەۆ. ال ۆەتنام كوممۋنيستىك پارتياسى ورتالىق كوميتەتىنىڭ باسشىسى تو لام وزىنە قازاقستان تاراپىنان كورسەتىلىپ جاتقان سىي-قۇرمەت ءۇشىن العىس ايتىپ، جۇرگىزىلىپ جاتقان كەلىسسوزدەردىڭ ناتيجەسى قازاقستان مەن ۆەتنام اراسىنداعى قارىم-قاتىناس كوكجيەگىن كەڭەيتۋگە ىقپال ەتەتىنىنە سەنىم بىلدىرگەن. «ءسىزدىڭ ۆەتنامعا جاساعان ساپارىڭىزدان كەيىن ەكى جىل وتكەندە ءبىزدىڭ دەلەگاتسيانىڭ ەلىڭىزگە ارنايى كەلۋى مەملەكەتتەرىمىزدىڭ ىنتىماقتاستىعى قارقىندى دامىپ كەلە جاتقانىن كورسەتەدى. سونىمەن قاتار ءوزارا سەنىم دەڭگەيىنىڭ جوعارى ەكەنىنە ايقىن دالەل. قازاقستان ۆەتنامنىڭ ورتالىق ازياداعى العاشقى ستراتەگيالىق سەرىكتەسىنە اينالادى»، – دەدى تو لام. ايتا كەتەيىك، بۇگىن 6 مامىر كۇنى قاسىم-جومارت توقاەۆ مەملەكەتتىك ساپارمەن كەلگەن ۆەتنام كوممۋنيستىك پارتياسى ورتالىق كوميتەتىنىڭ باس حاتشىسى تو لامدى اقوردادا قارسى الدى. بۇل كەلىسسوزدەر نەگىزىندە تاراپتار ماڭىزدى قۇجاتقا قول قويۋ جوسپارلانعان.