Qazaqstan Prezidentı Qasym-Jomart Toqaev Vetnam Kommunistık partiiasy Ortalyq komitetı Bas hatşysy şaǧyn qūramda To Lammen kelıssöz jürgızdı. Būl turaly Aqorda jariialady, dep habarlaidy “Adyrna” ūlttyq portaly.
Prezident Vetnam Kommunistık partiiasy Ortalyq komitetı Bas hatşysynyŋ Qazaqstanǧa alǧaş ret saparlap kelgenın, būl qadamdy ekı el arasyndaǧy myzǧymas dostyqtyŋ aiǧaǧy dep baǧalaǧan.
«Vetnam – Qazaqstannyŋ Aziiadaǧy maŋyzdy serıktesı. Bızdıŋ ösıp-örkendeu jolyndaǧy müddemız – ortaq. Men ekı jyl būryn Vetnamǧa resmi saparmen bardym. Sonda ekıjaqty yqpaldastyqtyŋ jaŋa baǧyttaryn damytuǧa uaǧdalastyq. Kelesı aida ekı el arasyndaǧy diplomatiialyq qatynastyŋ ornaǧanyna 33 jyl tolady. Aldaǧy uaqytta da qos halyqtyŋ dostyǧy nyǧaia bermek. Men būǧan kämıl senemın. Bız ortaq maqsat-mındetterge jetu üşın küş jūmyldyruǧa ärdaiym daiynbyz», – dedı Qasym-Jomart Toqaev.
Al Vetnam Kommunistık partiiasy Ortalyq komitetınıŋ basşysy To Lam özıne Qazaqstan tarapynan körsetılıp jatqan syi-qūrmet üşın alǧys aityp, jürgızılıp jatqan kelıssözderdıŋ nätijesı Qazaqstan men Vetnam arasyndaǧy qarym-qatynas kökjiegın keŋeituge yqpal etetınıne senım bıldırgen.
«Sızdıŋ Vetnamǧa jasaǧan saparyŋyzdan keiın ekı jyl ötkende bızdıŋ delegasiianyŋ elıŋızge arnaiy keluı memleketterımızdıŋ yntymaqtastyǧy qarqyndy damyp kele jatqanyn körsetedı. Sonymen qatar özara senım deŋgeiınıŋ joǧary ekenıne aiqyn dälel. Qazaqstan Vetnamnyŋ Ortalyq Aziiadaǧy alǧaşqy strategiialyq serıktesıne ainalady», – dedı To Lam.
Aita keteiık, bügın 6 mamyr künı Qasym-Jomart Toqaev memlekettık saparmen kelgen Vetnam Kommunistık partiiasy Ortalyq komitetınıŋ Bas hatşysy To Lamdy Aqordada qarsy aldy. Būl kelıssözder negızınde taraptar maŋyzdy qūjatqa qol qoiu josparlanǧan.
Ūqsas jaŋalyqtar
