الماتى وبلىسىنداعى قاپشاعاي سۋ قويماسى ەكىنشى جىل قاتارىنان 100 پايىز تولدى. بۇل تۋرالى بۇگىن، 5 ساۋىردە سۋ رەسۋرستارى جانە يرريگاتسيا مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
قازىرگى تاڭدا سۋ قويماسىندا شامامەن 18,5 ملرد تەكشە مەتر سۋ جينالعان. مينيسترلىكتىڭ مالىمەتىنشە، ونىڭ تولۋى وبلىستاعى اقدالا جانە شەڭگەلدى سۋارمالى القاپتارىن سۋمەن تولىقتاي قامتۋعا مۇمكىندىك بەرەدى.
قاپشاعاي سۋ قويماسى ىلە وزەنىنىڭ سۋ اعىنىن رەتتەپ وتىرادى. جىل باسىنان بەرى سۋ قويماسىنان بالقاش كولىنە 3,8 ملرد تەكشە مەتر سۋ جىبەرىلگەن. ال بىلتىر وسى كەزەڭدە بۇل كولەم 2,9 ملرد تەكشە مەتر بولعان.
سۋدىڭ مول بەرىلۋىنىڭ ارقاسىندا ءبىر جىلدىڭ ىشىندە بالقاش كولىنىڭ دەڭگەيى 12 سانتيمەترگە كوتەرىلىپ، بالتىق جۇيەسى بويىنشا 341,52 مەتردەن 341,64 مەترگە جەتكەن. ال كولدەگى سۋ كولەمى 2 ملرد تەكشە مەترگە ۇلعايعان.
ەسكە سالايىق، بىلتىر سۋ قويماسى سوڭعى 10 جىلدا العاش رەت 100%-عا تولعان بولاتىن.
