كوكشەتاۋلىق 17 جاستاعى جانەل ءتىرجانوۆا يسپانيا مەن گونكونگتىڭ بەدەلدى ۋنيۆەرسيتەتتەرىنەن گرانت جەڭىپ الىپ، بارلىق ەمتيحانداردى مەرزىمىنەن بۇرىن تاپسىردى، دەپ حابارلايدى "ادىرنا" ۇلتتىق پورتالى Kazinform-عا سىلتەمە جاساپ.
كوكشەتاۋ قالاسىنداعى ءال-فارابي اتىنداعى IT ليتسەيىنىڭ 11-سىنىپ تۇلەگى جانەل ءتىرجانوۆا شەتەلدىڭ 4 جوعارى وقۋ ورنىنان شاقىرتۋ العان.
«مەن بارلىق پاننەن بەسكە تولى اتتەستاتتى مەرزىمىنەن بۇرىن الدىم. شەتەلگە وقۋعا ءتۇسۋ ءۇشىن اتتەستاتتى ەرتەرەك الىپ، قۇجاتتاردى تەزىرەك اۋدارىپ، ۋنيۆەرسيتەتكە تاپسىرۋ قاجەت. سول سەبەپتى ەرتەرەك سۇراتتىم. مەملەكەتتىك ەمتيحانداردى ءۇشىنشى توقساننىڭ سوڭىندا تاپسىرىپ، 1 ساۋىردە قولىما اتتەستات ءتيدى. ماتەماتيكا، قازاق جانە ورىس ءتىلى، قازاقستان تاريحى پاندەرىنەن ەمتيحان تاپسىردىم. تاڭداۋ ءپانى رەتىندە اعىلشىن ءتىلىن الدىم. جالپى، 9-سىنىپتان باستاپ قاي ۋنيۆەرسيتەتكە قالاي تۇسۋگە بولاتىنىن ءوز بەتىمشە زەرتتەي باستادىم»، – دەيدى جانەل.
ەڭ الدىمەن – ESADE Business School (بارسەلونا). بۇل وقۋ ورنىندا جانەل «بيزنەس باسقارۋ جانە بيزنەستەگى جاساندى ينتەللەكت» قوس ديپلوم باعدارلاماسى بويىنشا تولىق گرانت ۇتىپ العان. ESADE — الەمدەگى ەڭ ۇزدىك بيزنەس-مەكتەپتەردىڭ ءبىرى، Financial Times Global MBA رەيتينگىندە الەم بويىنشا 17-ورىندا، ال ەۋروپادا 6-ورىندا تۇر.
ەكىنشى ۋنيۆەرسيتەت – IE University (مادريد). بۇل جەردە ول «بيزنەس باسقارۋ جانە دەرەكتەر مەن بيزنەس-اناليتيكا» باعىتى بويىنشا تولىق گرانت يەلەنگەن. IE University – ەۋروپاداعى ۇزدىك 10 بيزنەس ۋنيۆەرسيتەتتىڭ ءبىرى.
ءۇشىنشى – City University of Hong Kong. بۇل ۋنيۆەرسيتەت جانەلگە «FinTech» باعدارلاماسى بويىنشا شارتتى شاقىرتۋ مەن گرانت بەرگەن. QS World University Rankings 2025 رەيتينگى بويىنشا بۇل ۋنيۆەرسيتەت الەمدە 62-ورىندا، ال ازيادا 10-ورىندا.
ءتورتىنشى – Hong Kong University.
جانەلدىڭ «بيزنەس» پەن «جاساندى ينتەللەكتىنى بيزنەستە قولدانۋ» باعىتىن تاڭداعان. ول 10-سىنىپتان باستاپ «جاساندى ينتەللەكت پەن ماتەماتيكا» اتتى جوباسىن ازىرلەپ، وسى ەكى سالانىڭ بايلانىسىن زەرتتەي باستاعان.
قازىر جانەل بارسەلونانى الدىن الا تاڭداعان.
«ازىرگە بارسەلونانى تاڭداپ وتىرمىن. تامىز ايىنىڭ سوڭىندا سوندا جول جۇرەمىن. مەن تاڭداعان باعىت – «بيزنەس جانە بيزنەستەگى جي» – قازاقستاندا دا قازىر دامىپ كەلەدى. مىسالى، Kaspi-دەگى قارجىلىق تەحنولوگيالار باسقا ەلدەرمەن سالىستىرعاندا جاقسى دامىعان، بارلىعى تسيفرلاندىرىلعان. بىراق وقۋىمدى اياقتاعان سوڭ قازاقستانعا قايتىپ كەلەم بە، ول جاعىن ءازىر ناقتى ايتا المايمىن. بۇل تۋرالى كەيىن، ۋنيۆەرسيتەتتىڭ سوڭعى كۋرستارىندا ويلانىپ كورەم. قالاي بولعاندا دا، قازاقستان – مەنىڭ وتانىم، ول ماعان ءوز ارمانىمداعى ءبىلىمدى الۋ مۇمكىندىگىن بەردى»، – دەپ تۇيىندەدى جانەل.
