Kökşetaulyq 17 jastaǧy Janel Tırjanova İspaniia men Gonkongtyŋ bedeldı universitetterınen grant jeŋıp alyp, barlyq emtihandardy merzımınen būryn tapsyrdy, dep habarlaidy "Adyrna" ūlttyq portaly Kazinform-ǧa sılteme jasap.
Kökşetau qalasyndaǧy Äl-Farabi atyndaǧy IT liseiınıŋ 11-synyp tülegı Janel Tırjanova şeteldıŋ 4 joǧary oqu ornynan şaqyrtu alǧan.
«Men barlyq pännen beske toly attestatty merzımınen būryn aldym. Şetelge oquǧa tüsu üşın attestatty erterek alyp, qūjattardy tezırek audaryp, universitetke tapsyru qajet. Sol sebeptı erterek sūrattym. Memlekettık emtihandardy üşınşı toqsannyŋ soŋynda tapsyryp, 1 säuırde qolyma attestat tidı. Matematika, qazaq jäne orys tılı, Qazaqstan tarihy pänderınen emtihan tapsyrdym. Taŋdau pänı retınde aǧylşyn tılın aldym. Jalpy, 9-synyptan bastap qai universitetke qalai tüsuge bolatynyn öz betımşe zerttei bastadym», – deidı Janel.
Eŋ aldymen – ESADE Business School (Barselona). Būl oqu ornynda Janel «Biznes basqaru jäne biznestegı jasandy intellekt» qos diplom baǧdarlamasy boiynşa tolyq grant ūtyp alǧan. ESADE — älemdegı eŋ üzdık biznes-mektepterdıŋ bırı, Financial Times Global MBA reitingınde älem boiynşa 17-orynda, al Europada 6-orynda tūr.
Ekınşı universitet – IE University (Madrid). Būl jerde ol «Biznes basqaru jäne derekter men biznes-analitika» baǧyty boiynşa tolyq grant ielengen. IE University – Europadaǧy üzdık 10 biznes universitettıŋ bırı.
Üşınşı – City University of Hong Kong. Būl universitet Janelge «FinTech» baǧdarlamasy boiynşa şartty şaqyrtu men grant bergen. QS World University Rankings 2025 reitingı boiynşa būl universitet älemde 62-orynda, al Aziiada 10-orynda.
Törtınşı – Hong Kong University.
Janeldıŋ «Biznes» pen «Jasandy intellektını bizneste qoldanu» baǧytyn taŋdaǧan. Ol 10-synyptan bastap «Jasandy intellekt pen matematika» atty jobasyn äzırlep, osy ekı salanyŋ bailanysyn zerttei bastaǧan.
Qazır Janel Barselonany aldyn ala taŋdaǧan.
«Äzırge Barselonany taŋdap otyrmyn. Tamyz aiynyŋ soŋynda sonda jol jüremın. Men taŋdaǧan baǧyt – «Biznes jäne biznestegı Jİ» – Qazaqstanda da qazır damyp keledı. Mysaly, Kaspi-degı qarjylyq tehnologiialar basqa eldermen salystyrǧanda jaqsy damyǧan, barlyǧy sifrlandyrylǧan. Bıraq oquymdy aiaqtaǧan soŋ Qazaqstanǧa qaityp kelem be, ol jaǧyn äzır naqty aita almaimyn. Būl turaly keiın, universitettıŋ soŋǧy kurstarynda oilanyp körem. Qalai bolǧanda da, Qazaqstan – menıŋ otanym, ol maǧan öz armanymdaǧy bılımdı alu mümkındıgın berdı», – dep tüiındedı Janel.
