ماسكەۋ بەزىنگەن قازاقستاندىقتار كىمدەر؟

4249
Adyrna.kz Telegram
https://adyrna.kz/content/uploads/2025/05/whatsapp-image-2025-05-03-at-11.24.27-960x500.jpeg?token=d1a8de6c8079299f84350bf552f6f637

رەسەي فەدەراتسياسى قازاقستاننىڭ بىرقاتار قوعام بەلسەندەرى مەن دەپۋتاتتارىنا ەل اۋماعىنا كىرۋگە تىيىم سالدى، دەپ حابارلايدى "ادىرنا" ۇلتتىق پورتالى Deutsche Welle راديوسىنا سىلتەمە جاساپ.

DW تاراتقان مالىمەتكە سايكەس، جاقىندا رەسەيلىك تاريحشى اندرەي گروزينگە قازاقستانعا كىرۋگە رۇقسات بەرىلمەگەننەن كەيىن ەكى ەلدەگى "قالاۋسىز تۇلعالار" ءتىزىمى جاريا بولعان. قازاقستان اۋماعىنا كىرۋگە تىيىم سالىنعاندار قاتارىندا رەسەيدىڭ تانىمال تۇلعالارى تينا كاندەلاكي، تيگران كەوسايان، الەكساندر دۋگين، نيكيتا مەندكوۆيچ، مەمدۋما دەپۋتاتتارى ەۆگەني فەدوروۆ، ۆياچەسلاۆ نيكونوۆ پەن پەتر تولستوي بار.

ال رەسەي تاراپى دا ءوز كەزەگىندە قازاقستاننىڭ تانىمال ازاماتتارىنا شەكتەۋ قويعان. بۇل تىزىمدە ساياساتتانۋشىلار دوسىم ساتباەۆ پەن ديماش ءالجانوۆ، قوعام بەلسەندىلەرى مۇحتار تايجان مەن توعجان قوجالى، سونداي-اق ءماجىلىس دەپۋتاتتارى ەرمۇرات باپي مەن ايدوس سارىم بار.

ايدوس سارىمنىڭ ايتۋىنشا، وعان رەسەيگە كىرۋگە تىيىم سالىنعانى 2021 جىلى بريۋسسەلگە ساپار كەزىندە انىقتالعان.

"دەلەگاتسيامىز ماسكەۋ ارقىلى بريۋسسەلگە ۇشپاق بولدى. ماسكەۋدە توعىز ساعاتتاي ايالدايتىن ەدىك، سوندىقتان قازاقستان ەلشىلىگى استاناداعى ءبىر ءىس-شاراعا قاتىسۋدى ۇسىندى. بىراق مەنى، ديپلوماتيالىق تولقۇجاتىم بولسا دا، قالاعا كىرگىزبەدى. بارلىعى ءوتتى، تەك مەن عانا شەتتە قالدىم. شەكارا قىزمەتىندە ۇزاق تۇرىپ، كونسۋل شاقىرتتىم. كەيىن فسب وفيتسەرى كەلىپ، ماعان "persona non grata" (رەد. قالاۋسىز تۇلعا) ەكەنىمدى راستايتىن قۇجاتتى قولحاتپەن تابىستادى. وندا سەبەپ كورسەتىلمەگەن، تەك ەسكەرتۋ جاسالدى: تىيىمدى بۇزسام، سەگىز جىلعا دەيىن باس بوستاندىعىمنان ايىرىلۋىم مۇمكىن", – دەدى دەپۋتات.

ايتا كەتەيىك، رەسەي ساياساتتانۋشىسى اندرەي گروزين 27 ءساۋىر كۇنى استانا اۋەجايىندا تولقۇجاتتىق باقىلاۋدان وتە الماي، كەلەسى كۇنى ماسكەۋگە كەرى قايتۋعا ءماجبۇر بولعانى تۋرالى حابارلاعان ەدىك. قازاقستاندىق ساياساتتانۋشى مارات شيبۇتوۆ Telegram-ارناسىندا بۇل شەشىم رەسەيدىڭ قازاقستاندىق عالىمدارعا جاپپاي تىيىم سالۋىنا جاۋاپ بولۋى مۇمكىن ەكەنىن جازعان.

پىكىرلەر