"اتاجۇرت ەرىكتىلەرى" بەلسەندىلەرى نەگە ءبولىندى؟

386

AzattyqLIVE تىكەلەي ەفيرىندە قىتايداعى ەتنيكالىق قازاقتارعا قىسىم ماسەلەسىن كوتەرىپ جۇرگەن "اتاجۇرت ەرىكتىلەرى" ۇيىمىنىڭ تىركەلۋى، ونىڭ بەلسەندىلەرىنىڭ ءبولىنۋى ماسەلەسى تالقىلاندى. حابارعا ۇيىم جەتەكشىسى ەربول داۋلەتبەكۇلى مەن بەلسەندى بەكزات ماقسۇتحانۇلى قاتىستى.

تىكەلەي ەفيردى كورىڭىز:

 

https://www.youtube.com/watch?time_continue=6&v=0ZlkotG6q-M

"اتاجۇرت ەرىكتىلەرى" ۇيىمى 2017 جىلدان بەرى شىڭجاڭداعى از ۇلتتارعا جاسالعان قىسىم ماسەلەسىن كوتەرىپ، ولاردىڭ شاعىمدارىن قۇجاتقا تۇسىرۋمەن اينالىسىپ كەلەدى.

ۇيىم كەڭسەسىندە وتكەن جيىنداردا "قىتايداعى "قايتا ساياسي تاربيەلەۋ لاگەرلەرىندە" قاماۋدا وتىرعانداردىڭ تۋىستارىنىڭ ارىز-شاعىمدارى ايتىلىپ، قىتاي بيلىگى قويعان شەكتەۋلەرگە بايلانىستى وتانىنا جەتە الماي وتىرعان ەتنيكالىق قازاقتار ماسەلەسى دە ايتىلىپ ءجۇر.

وسى اپتادا "اتاجۇرت ەرىكتىلەرى" ۇيىمى الماتى قالاسى ادىلەت دەپارتامەنتىندە تىركەلگەنىن حابارلادى. ۇيىم بۇعان دەيىن بىرنەشە رەت ءوتىنىش بەرگەنىمەن "قۇجاتتارىنىڭ دۇرىس ەمەستىگىنە" بايلانىستى تىركەلە الماعان. سول ءۇشىن "اتاجۇرت ەرىكتىلەرى" قىركۇيەك ايىندا دەپارتامەنتتى سوتقا بەرگەن، ال تىركەۋدەن وتكەنى بەلگىلى بولعاننان كەيىن ارىزىن قايتارىپ العان.

ۇيىمنىڭ بۇرىنعى جەتەكشىسى سەرىكجان ءبىلاش (قۇجات بويىنشا - بياش) 2019 جىلعى ناۋرىز ايىندا "الەۋمەتتىك الاۋىزدىق تۋدىردى" دەگەن ايىپپەن بىرنەشە اي نۇر-سۇلتاندا ۇيقاماقتا وتىردى. ونىڭ ىسىنە حالىقارالىق ۇيىمدار رەاكتسيا ءبىلدىردى. قازاقستاننىڭ ءار جەرىندە ءبىلاشتى بوساتۋدى تالاپ ەتكەن اكتسيالار ءوتتى. تامىز ايىندا الماتى قالاسى اۋەزوۆ اۋداندىق سوتى بەلسەندىنى قاماۋدان بوساتىپ، 110 مىڭ تەڭگە (شامامەن 288 دوللار) كولەمىندە ايىپپۇل سالدى. ونى قوعامدىق ۇيىمدى باسقارۋ قۇقىعىنان جەتى جىلعا ايىردى. ​

2017 جىلدىڭ كوكتەمىنەن باستاپ قىتايدىڭ شىڭجاڭ ايماعىندا ەتنيكالىق ازشىلىقتارعا، سونىڭ ىشىندە ەتنيكالىق قازاقتارعا دا قىسىم كورسەتىلىپ، "ساياسي لاگەر" اتالعان جاپپاي قاماۋ ورىندارى پايدا بولعانى تۋرالى حابار تاراي باستاعان. قىتايدان ورالعان ەتنيكالىق قازاقتار قىتايعا قازاقستاننان جولاۋشىلاپ بارعاندا قايتا الماي، كەيبىرى ساياسي لاگەرگە الىپ كەتكەنى جايلى شاعىمدانعان.

وتكەن جىلى بۇۇ شىڭجاڭدا ميلليونعا جۋىق ەتنيكالىق ۇيعىر مەن وزگە دە تۇركىتىلدەس ۇلت وكىلدەرىن قىتايدىڭ سولتۇستىك-باتىسىنداعى "ساياسي تاربيە لاگەرلەرىندە" ۇستاپ وتىرعانى تۋرالى مالىمدەگەن. باستاپقىدا مۇنداي اقپاراتتى تەرىستەگەن پەكين كەيىن ونى "ەكسترەميزمگە قارسى شارا" دەپ تۇسىندىرگەن جانە ساياسي لاگەرلەردى ء"تىل ۇيرەنىپ، كاسىپكە باۋليتىن" ورتالىقتار دەپ اتاعان.

اقش پەن باتىس ەلدەرى پەكيننىڭ شىڭجاڭداعى ساياساتىن "از ۇلتتاردىڭ مادەنيەتى مەن ءدىنىن جويۋ امالى" دەپ اتادى. جاقىندا اقش مەملەكەتتىك حاتشىسى مايك پومپەو ورتالىق ازيا ەلدەرىنىڭ سىرتقى ىستەر مينيسترلەرىمەن كەزدەسۋىندە پەكيننىڭ ەتنيكالىق ۇيعىرلاردى قىتايعا قايتارۋ تۋرالى تالابىن ورىنداماۋعا شاقىردى.

AzattyqLIVE تىكەلەي ەفيرىندە رەسمي تىركەلگەن "اتاجۇرت ەرىكتىلەرى" قوعامدىق ۇيىمىنىڭ قازىرگى باسشىسى ەربول داۋلەتبەكۇلى مەن ۇيىمنىڭ بۇرىنعى جەتەكشىسى بەكزات ماقسۇتحانۇلى پىكىر تالاستىردى.

"ازاتتىق" راديوسى

پىكىرلەر