وبلىستىق اۋىل شارۋاشىلىعى قىزمەتكەرلەرى كاسىپوداعىنىڭ توراعاسى تلەپبەرگەن ايكەنوۆ مەملەكەت باسشىسى قاسىم-جومارت توقاەۆ جاريالاعان جۇمىسشى ماماندىقتار جىلىنىڭ نەگىزگى مىندەتتەرى مەن باعىتتارىن باياندادى، دەپ حابارلايدى وڭىرلىك كوممۋنيكاتسيالار قىزمەتىنەن.
«بۇل – ۋاقتىلى ءارى ادىلەتتى شەشىم. ول كاسىپوداقتار، ۇكىمەت پەن جۇمىس بەرۋشىلەر اراسىنداعى سەرىكتەستىكتى نىعايتىپ، ميلليونداعان قازاقستاندىق ءۇشىن لايىقتى ەڭبەك جاعدايىن جاساۋعا باعىتتالعان ورتاق ماقساتقا جول اشادى»، – دەدى ايكەنوۆ.ونىڭ ايتۋىنشا، ناقتى سەكتوردىڭ دامۋى بىلىكتى جۇمىسشى كادرلارسىز مۇمكىن ەمەس. الايدا بۇگىندە قول ەڭبەگىمەن بايلانىستى ماماندىقتاردىڭ قوعامداعى بەدەلى تومەندەگەن. جاستار مۇنداي ماماندىقتاردى سيرەك تاڭدايدى، ال جاعدايدى تەك جەكەلەگەن شارالارمەن وزگەرتۋ قيىن.
«ادام تەك ەكونوميكالىق ەمەس، الەۋمەتتىك ءمانى بار تۇلعا. ەگەر قوعامدا ‘قول ەڭبەگى – ەكىنشى سورت’ دەگەن تۇسىنىك ساقتالسا، ءبىز تۇراقتى ەكونوميكا قۇرا المايمىز»، – دەدى سپيكەر.تلەپبەرگەن ايكەنوۆ جالاقىنى كوتەرۋ تەك ءبىر قادام ەكەنىن، ەڭ ماڭىزدىسى ماماندىقتار تۋرالى قوعامدىق كوزقاراستى وزگەرتۋ ەكەنىن اتاپ ءوتتى:
«بۇل ۇزاق مەرزىمدى، جۇيەلى جۇمىس. ءبىز مەكتەپ قابىرعاسىنان باستاپ بالالارعا ءتۇرلى ماماندىقتار تۋرالى ايتىپ، ەڭبەك جولىندا تابىسقا جەتكەن تۇلعالاردى ۇلگى ەتىپ، ءوندىرىس ورىندارىن تانىستىرۋىمىز كەرەك»، – دەدى ول.كاسىپوداقتار كاسىپتىك-تەحنيكالىق ءبىلىم بەرۋ جۇيەسىنە ەرەكشە نازار اۋدارماق. بۇل جۇيە قازىرگى زامان مەن ەكونوميكا سۇرانىسىنا ساي بەيىمدەلۋى ءتيىس. سونداي-اق كاسىپوداقتار زاڭنامالىق اكتىلەردى جەتىلدىرۋ جانە پارلامەنتتەگى «ەڭبەك» دەپۋتاتتىق بىرلەستىگىمەن ديالوگ جۇرگىزۋ ىسىنە بەلسەندى قاتىساتىن بولادى.
«قوعام يگىلىگىن جاسايتىن ەڭبەك ادامى مۇقتاجدىق كورمەۋى كەرەك. ونىڭ تابىسى تەك كۇندەلىكتى قاجەتتىلىكتەرىن ەمەس، ءوزىن-ءوزى دامىتۋعا دا مۇمكىندىك بەرۋى ءتيىس»، دەدى ايكەنوۆ.ول قازاقستان كاسىپوداقتارى ەڭبەك قۇقىقتارىن كاسىبي قورعاۋمەن اينالىساتىن ءىرى قوعامدىق كۇش رەتىندە جۇمىسشى ماماندىقتار جىلى اياسىنداعى مىندەتتەردىڭ جۇزەگە اسۋىنا ءوز ۇلەسىن قوسۋعا دايىن ەكەنىن جەتكىزدى.
«ەڭبەك ادامى – ەكونوميكالىق ءوسىمنىڭ نەگىزى. ال وعان دەگەن قۇرمەت ونىڭ ەڭبەگىنىڭ قۇندىلىعىن مويىنداۋدان باستالادى»، – دەپ تۇيىندەدى كاسىپوداق توراعاسى.
