1 مامىر كۇنى الماتى قالاسىنىڭ جەتىسۋ اۋدانىندا «قازاقستانداعى ەڭ ۇزىن لاعمان» ازىرلەۋ شاراسى ءوتتى. شارا بارىسىندا ەلدىڭ جاڭا رەكوردى تىركەلدى، دەپ حابارلايدى «ادىرنا» ءتىلشىسى.
قالا اكىمدىگىنىڭ مالىمەتىنشە، «اينابۇلاق» شاعىن اۋدانىنداعى № 4 مامانداندىرىلعان بالالار-جاسوسپىرىمدەر سپورت مەكتەبىندە ەل تاريحىنداعى ەڭ ۇزىن — 1704 مەتر بولاتىن لاعمان دايىندالدى جانە بۇل فاكت قازاقستاننىڭ رەكوردتار كىتابىندا رەسمي تىركەلدى. جالپى 19 كەلى ۇننان قامىر يلەنىپ، 50-دەن استام اسپاز تاعامدى ەكى ساعاتتىڭ ىشىندە دايىنداعان.
«لاعمان قانشا مەتر بولسا دا، رەكورد ورنادى، ويتكەنى مۇنداي شارا ەلىمىزدە العاش رەت وتكىزىلىپ وتىر. ءبىز ونىڭ ۇزىندىعىن عانا ەمەس، ۇلتارالىق بايلانىستىڭ بەرىكتىگىن دە بايقادىق»،- دەپ اتاپ ءوتتى قازاقستان رەكوردتار كىتابىنىڭ رەسمي وكىلى باقىتجان ءسابيتۇلى.
