ۋكراينا مەن اقش اراسىندا پايدالى قازبالارعا قاتىستى ماڭىزدى كەلىسىمگە قول قويىلماق، دەپ حابارلايدى "ادىرنا" ۇلتتىق پورتالى.
Reuters اگەنتتىگى تاراتقان اقپاراتقا سايكەس، كەلىسىم 30 ءساۋىر كۇنى بەكىتىلۋى مۇمكىن.
ۋكراينانىڭ ەكونوميكا ءمينيسترى يۋليا سۆيريدەنكو ۆاشينگتونعا كەلىسىمگە قول قويۋ ماقساتىندا جول تارتقان. اتالعان كەلىسسوزدەر اقش-تىڭ بۇرىنعى پرەزيدەنتى دونالد ترامپ قىزمەتكە كەلگەن العاشقى اپتالارىندا باستالعان.
كەلىسىم جوباسى ۋكراينادا ينۆەستيتسيالىق جوبالاردى باسقارۋعا ارنالعان بىرلەسكەن قور قۇرۋدى كوزدەيدى. دەگەنمەن، قوردىڭ ناقتى جۇمىس ىستەۋ ءتارتىبىن رەتتەيتىن ەكى تەحنيكالىق كەلىسىمنىڭ ءماتىنى ءالى تولىق ماقۇلدانباعان.
Bloomberg اگەنتتىگىنىڭ جازۋىنشا، كەلىسىم جوباسىندا اقش پەن ۋكراينا "ۋكراينانىڭ تاۋ-كەن ءوندىرىسى، ەنەرگەتيكا جانە ونىمەن بايلانىستى سالالارعا ينۆەستيتسيا تارتۋعا جاعداي جاسايدى" دەلىنگەن. بۇل ماقساتتا قۇرىلاتىن ينۆەستيتسيالىق قوردىڭ تابىسى تاراپتار اراسىندا تەڭ بولىنەدى.
اقش پەن ۋكراينا اراسىنداعى كەلىسىمگە ەلدىڭ ەنەرگەتيكالىق ينفراقۇرىلىمى مەن پورتتارى كىرمەيدى. بۇعان دەيىن اقش اكىمشىلىگى ۋكراينادان سيرەك مەتالداردان بولەك، پورتتار مەن ينفراقۇرىلىمداردى دا قامتۋىن سۇراعان بولاتىن. الايدا كەيىن بۇل تالاپتان باس تارتقان.
كەلىسىمگە سايكەس، اقش پەن ۋكراينا سيرەك مەتالداردان تۇسكەن تابىستى بىرلەسكەن قورعا اۋدارادى. قورعا تۇسكەن قاراجات ەكى ەل اراسىندا 50/50 ۇلەسپەن بولىنەدى. ۋكراينا ءوزىنىڭ پايدالى قازبالارى مەن ينفراقۇرىلىمىنا تولىق يەلىك ەتەدى. سونىمەن قاتار، اقش تاراپىنان كورسەتىلگەن اسكەري كومەك تە وسى قورعا سالىنعان ينۆەستيتسيا رەتىندە ەسەپتەلمەك.
اقپان ايىندا ۋكراينا پرەزيدەنتى ۆلاديمير زەلەنسكي اقش ۇسىنعان العاشقى كەلىسىم جوباسىنا قول قويۋدان باس تارتقان بولاتىن. الايدا سوڭعى كەلىسىم نۇسقاسى تاراپتاردىڭ مۇددەسىنە ساي كەلەدى دەپ كۇتىلۋدە.
