ۇلى جەڭىستىڭ 80 جىلدىعى جانە قازاقستان حالقى اسسامبلەياسىنىڭ 30 جىلدىعىنا وراي ۇلىتاۋ وبلىسىندا «تازا قازاقستان» رەسپۋبليكالىق ەكولوگيالىق اكتسياسى ءوتتى.
تازالىق ءىس-شاراسىندا بۇگىن ءوڭىردى كوگالداندىرۋعا باسىمدىق بەرىلىپ، «بۇكىلقازاقستاندىق اعاش ەگۋ كۇنى» دەپ اتالىپ ءوتتى.
جالپى وبلىس اۋماعىندا 6400 ءتۇپ اعاش كوشەتى وتىرعىزىلدى. بۇل باستاما ءوڭىردىڭ ەكولوگيالىق جاعدايىن جاقسارتۋعا، تابيعاتتى قورعاۋعا جانە جاسىل جەلەكتەر سانىن ارتتىرۋعا باعىتتالدى. ونىڭ ىشىندە وبلىسىمىزدىڭ قۇقىق قورعاۋ، ارناۋلى جانە سوت ورگاندارى قىزمەتكەرلەرى ارنايى مىڭ ءتۇپ اعاش وتىرعىزدى. وسىلايشا، جەزقازعان قالاسىنىڭ «ناۋرىز» ساياباعىندا جاڭا اللەيا پايدا بولدى.
يگى باستاماعا ۇلىتاۋ وبلىسىنداعى بارلىق ءدىني بىرلەستىكتىڭ باسشىلارى دا بەلسەندى قاتىسىپ، بىرلىك پەن تاتۋلىقتىڭ جارقىن ۇلگىسىن كورسەتتى.
سونداي-اق بارلىق ەلدى مەكەندە كەڭ كولەمدى تازالىق جۇمىستارى دا ۇيىمداستىرىلدى.
اكتسياعا وبلىس بويىنشا 3335 ادام جانە 1085 ۇجىم بەلسەندى قاتىسىپ، 58 ارنايى تەحنيكا جۇمىلدىرىلدى. ناتيجەسىندە 520 توننا تۇرمىستىق جانە وندىرىستىك قالدىقتار شىعارىلىپ، ءوڭىردىڭ سانيتارلىق جاعدايى ايتارلىقتاي جاقساردى.
ۇيىمداستىرۋشىلار مەن قاتىسۋشىلار اتالمىش اكتسيانىڭ قورشاعان ورتانى قورعاۋ مادەنيەتىن قالىپتاستىرۋدا، سونداي-اق ۇرپاق تاربيەسىندە ماڭىزدى ءرول اتقاراتىنىن اتاپ ءوتتى.
