اقمولا وبلىسى اۋىل شارۋاشىلىعى ساناعىنا دايىندالىپ جاتىر

بۇل تۋرالى وبلىس اكىمىنىڭ ورىنباسارى مۇرات بالپاننىڭ توراعالىعىمەن وتكەن اكىمدىك جينالىسىندا ايتىلدى. جيىندا ايتىلعانداي، 2025 جىلى قازاقستان اۋقىمدى ستاتيستيكالىق ناۋقانعا – ۇلتتىق اۋىل شارۋاشىلىعى ساناعىنا دايىندالىپ جاتىر. بۇل ماڭىزدى شارا الداعى جىلدارى اگرارلىق سالانىڭ قالاي داميتىنىنا تىكەلەي اسەر ەتپەك. اسىرەسە، ەل حالقىنىڭ جارتىسىنان استامى اۋىل شارۋاشىلىعىمەن اينالىساتىن اقمولا وبلىسى ءۇشىن بۇل ساناقتىڭ ماڭىزى ەرەكشە. ساناقتىڭ باستى ماقساتى – ەلدىڭ اۋىلدىق ايماقتارىندا ناقتى نە بولىپ جاتقانىن شىنايى ءارى تولىق كورسەتۋ. اتاپ ايتقاندا  اۋىلدا كىم  قانداي شارۋامەن اينالىسادى، كىمنىڭ قانشا جەرى، تەحنيكاسى، مالى بار، قانداي ماسەلەلەرى بار جانە مەملەكەتتىك قولداۋدى كىمگە قالاي باعىتتاۋ قاجەت ەكەنىن انىقتاۋ ماقساتىندا. ءبىرىنشى كەزەڭ 2025 جىلدىڭ ماۋسىم ايىندا باستالادى. بۇل كەزدە ينتەرۆيۋەرلەر الدىن الا دايىندىق جۇرگىزىپ، اۋىل تۇرعىندارىمەن جۇمىسقا كىرىسەدى. نەگىزگى كەزەڭ – 20 قىركۇيەك پەن 20 قازان ارالىعىندا وتەدى. بۇل كەزەڭدە ءىرى اۋىل شارۋاشىلىعى كاسىپورىندارىنان باستاپ، شاعىن شارۋاشىلىقتارعا دەيىن تۇگەل قامتىلادى. ازاماتتارعا دەرەكتەردى تاپسىرۋدىڭ ەكى جولى ۇسىنىلادى: sanaq.gov.kz پورتالىندا ونلاين تۇردە نەمەسە ينتەرۆيۋەر ارقىلى. بۇگىندە وڭىردە جۇمىس توپتارى قۇرىلىپ، قىزمەتكەرلەرگە وقىتۋ جۇمىستارى جۇرگىزىلۋدە. پيلوتتىق ساۋالنامالار ساناق جۇيەسىنىڭ كەڭ اۋقىمدى جۇمىسقا دايىن ەكەنىن كورسەتتى. ۇيىمداستىرۋشىلار اتاپ وتكەندەي، بارلىق دەرەك قۇپيا ساقتالادى، ال ساناققا قاتىسۋ – ءار ازاماتتىڭ اۋىل بولاشاعىنا قوسقان ۇلەسى. اقمولا وبلىسىنىڭ اۋداندارىندا ساناقشىلار  جۇمىسىن قامتاماسىز ەتۋ، تەحنيكالىق جابدىقتاۋ، كولىكپەن قامتۋ، ناقتى مەكەنجايلاردى انىقتاۋ، ساۋالناما جۇرگىزۋگە قولايلى ورىنداردى بەلگىلەۋ سياقتى جۇمىستار اتقارىلىپ جاتىر. بۇل سوزدەر تەك ۇران عانا ەمەس – ءومىر شىندىعى. اگرارلىق سالا – ەلىمىزدىڭ ەكونوميكاسى مەن ازىق-تۇلىك قاۋىپسىزدىگىنىڭ نەگىزى. سوندىقتان بۇل سالانىڭ ارتىندا ناقتى ادامدار، ەڭبەككەرلەر، وتباسىلار تۇر. سولاردىڭ ءۇنى ەستىلىپ، ەڭبەگى باعالانۋى ءۇشىن ءدال وسىنداي ساناق ماڭىزدى. قازىر اۋىل تۇرعىندارى بۇل باستامانى بۇرىنعىداي فورمالدىلىق ەمەس، ءوز ءومىرىن، ماسەلەسىن، ەڭبەگىن كورسەتۋگە مۇمكىندىك رەتىندە قابىلداي باستادى. ال بۇل – اۋىلدىڭ شىنايى كەلبەتىن ايقىنداۋعا جاسالعان ۇلكەن قادام.