Air Astana áýe kompanııasy ushaǵynyń fıýzelıajynan jaryqshaq tabyldy. Prokýratýra tekseris júrgizip jatyr, dep habarlaıdy “Adyrna” ulttyq portaly QazTAG agenttigine siltep.
2025 jylǵy 18 sáýirde Telegram-daǵy «Berkut 001» arnasynda jarııalanǵan aqparatqa sáıkes, Memleket basshysynyń tapsyrmasymen kólik prokýratýrasy men Qazaqstannyń Avıaııalyq ákimshiligi áýe qaýipsizdigi salasynda keń kólemdi tekseris júrgizip jatyr.
Atalǵan tekseris barysynda Air Astana áýe kompanııasyna tıesili ushaqtyń fıýzelıajynyń artqy júk bóliginiń mańynan eni shamamen 25 santımetr bolatyn jaryqshaq anyqtalǵan. Osyǵan baılanysty ushaqtyń paıdalanylýy ýaqytsha toqtatyldy.
Sonymen qatar, Telegram arnadaǵy jazbada tekseriske qatysyp jatqan laýazymdy tulǵalarǵa qysym kórsetilip jatqany, ıaǵnı qaýipsizdikke úlken qater tóndiretin bul aqaýdy mańyzdy emes eskertý retinde tirkeýge ıtermeleý áreketteri týraly da aıtylǵan.
QazTAG agenttigi bul málimetti Bas prokýratýradan rastaýdy suraǵan.
«Memleket basshysy men Bas prokýrordyń tapsyrmalaryn oryndaý maqsatynda turaqty jolaýshy tasymaldaryn júzege asyratyn áýe kompanııalardyń qyzmetine tekseris júrgizilýde. Bul jumysqa ýákiletti memlekettik organdar men uıymdar tartylǵan. Tekseristerdiń maqsaty – ushýlar qaýipsizdigi men avıaııalyq qaýipsizdik salasyndaǵy zańnamanyń saqtalýyn qamtamasyz etý. Qazirgi tańda jumys jalǵasýda, onyń nátıjeleri buqaralyq aqparat quraldary arqyly jarııa etiledi», – delingen prokýratýra jaýabynda.
