تاسىمالداۋعا كەلمەيتىن ناۋقاستاردى جانە سوعىس ۋاقىتىندا جۇمىسىن جالعاستىراتىن ۇيىمداردى قورعاۋعا ارنالعان ازاماتتىق قورعانىس قۇرىلىمدارىنىڭ 70%-دان استامى جەكە مەنشىكتە ەكەنى انىقتالدى. مۇنى 2024 جىلى جۇرگىزىلگەن تۇگەندەۋ كورسەتتى. بۇل تۋرالى توتەنشە جاعدايلار ءمينيسترى شىڭعىس ءارىنوۆ دەپۋتاتتىق ساۋالعا بەرگەن جاۋابىندا ايتتى، دەپ حابارلايدى “ادىرنا” ۇلتتىق پورتالى Vlast.kz سايتىنا سىلتەپ.
بۇعان دەيىن قر پارلامەنتى ءماجىلىسىنىڭ جالپىۇلتتىق سوتسيال-دەموكراتيالىق پارتيا (جسدپ) فراكتسياسىنىڭ دەپۋتاتى اجار ساعىندىقوۆا “حالىقتى باسپانامەن قامتاماسىز ەتۋ ءۇشىن قازاقستاننىڭ ەلدى مەكەندەرىندەگى زاماناۋي قارۋدىڭ زياندى اسەرىن ازايتا الاتىن بارلىق عيماراتتار مەن قۇرىلىستارعا تۇگەندەۋ جۇرگىزىلدى مە” دەگەن سۇراققا قىزىعۋشىلىق تانىتقان بولاتىن.
ءوز جاۋابىندا مينيستر شىڭعىس ءارىنوۆ ازاماتتىق قورعانىسقا قۇرىلىمى زاماناۋي زاقىمداۋشى قۇرالداردىڭ اسەرىنەن قورعاۋ ماقساتىندا سالىناتىنىن اتاپ ءوتتى. بۇل قۇرىلىستار تاسىمالداۋعا كەلمەيتىن ناۋقاستاردى، سونداي-اق دەنساۋلىق ساقتاۋ نىساندارىنىڭ مەديتسينا جانە قىزمەت كورسەتۋشىلەردى، سونىمەن قاتار سوعىس ۋاقىتىندا جۇمىس ىستەيتىن ۇيىمداردىڭ نەگىزگى جۇمىس اۋىسىمىن قورعاۋعا ارنالعان. ءمينيستردىڭ ايتۋىنشا، ولار تابيعي سيپاتتاعى توتەنشە جاعدايلاردان قورعاۋعا ارنالماعان.
«سوڭعى بەس جىلدا 70 ازاماتتىق قورعانىس قۇرىلىمى جاڭادان سالىندى جانە دايىن كۇيگە كەلتىرىلدى. 2024 جىلعى تۇگەندەۋ ناتيجەسىندە قورعانىس قۇرىلىستارىنىڭ جالپى قورىنىڭ ىشىندە 70%-دان استامى جەكە مەنشىكتە، ال شامامەن 30%-ى مەملەكەتتىك مەنشىكتە ەكەنى انىقتالدى. يەسىز قالعانى – 16, جەرگىلىكتى اتقارۋشى ورگانداردىڭ بالانسىندا 71 نىسان بار. ولاردى كۇتىپ-ۇستاۋعا 2024 جىلى 110 ميلليون تەڭگە ءبولىندى»، – دەدى ءارىنوۆ.
سونداي-اق، 2014 جىلدان 2024 جىلعا دەيىن «قورعاۋ قاسيەتتەرىن جوعالتۋىنا بايلانىستى» 171 قورعانىس نىسانى ەسەپتەن شىعارىلعان.
مينيستر قورعانىس قۇرىلىستارىنىڭ سانى مەن جاي-كۇيى تۋرالى اقپارات «قىزمەتتىك پايدالانۋ ءۇشىن» عانا ەكەنىن، سوندىقتان ولاردىڭ دايىندىعى قاۋىپسىزدىك كەڭەسىنىڭ وتىرىستارىندا قارالاتىنىن ايتتى.
جالپى العاندا، قازىرگى زامانعى زاقىمداۋشى قۇرالداردىڭ اسەرىنەن حالىقتى قورعاۋ ءۇشىن قاراپايىم جاسىرىناتىن ورىندار – جەرتولەلەر، تسوكولدى قاباتتار، جەراستى اۆتوتۇراقتار، ساۋدا ۇيلەرىنىڭ پاركينگتەرى، جەكە ورنالاسقان جەر استى قۇرىلىستارى، مەتروپوليتەندەر، جەراستى وتكەلدەر جانە ت.ب. بار. تجم مالىمەتىنشە، قازاقستاندا مۇنداي جاسىرىناتىن ورىندار سانى – شامامەن 14,5 مىڭ، ولاردا 15 ميلليونعا جۋىق ادام پانالاي الادى.
سونىمەن قاتار، اۋقىمدى توتەنشە جاعدايلار كەزىندە زارداپ شەككەن حالىقتى قابىلدايتىن 3 952 پۋنكت دايىندالعان. بۇل پۋنكتتەر زارداپ شەككەندەردى جيناۋعا، تىركەۋگە، ۋاقىتشا ورنالاستىرۋعا، العاشقى قاجەتتى زاتتارمەن قامتاماسىز ەتۋگە، مەديتسينالىق كومەك كورسەتۋگە جانە قاۋىپسىز اۋداندارعا ەۆاكۋاتسيالاۋعا ارنالعان.
«حالىقتى اقپاراتتاندىرۋ جانە زارداپ شەككەن حالىقتى قابىلداۋ پۋنكتتەرىنە ەڭ وڭتايلى مارشرۋتتاردى جەدەل قۇرۋ ماقساتىندا تجم-ءنىڭ باستاماسىمەن بۇل پۋنكتتەر «2گيس» جانە «ياندەكس كارتا» پلاتفورمالارىنا ەنگىزىلدى»، – دەدى ءارىنوۆ.
ەڭ كوپ پۋنكت الماتىدا – 545, جامبىل وبلىسىندا – 423, الماتى وبلىسىندا – 417. ەڭ از سانى استانادا – 16 جانە باتىس قازاقستان وبلىسىندا – 14.
