AQSh prezıdenti Donald Tramp Ýkraınadan Qyrymdy Reseıdiń jeri dep moıyndaýdy talap etip otyrǵan joq, Bul týraly Aq úı málimdedi, dep habarlaıdy “Adyrna” ulttyq portaly.
"Prezıdent Ýkraınadan Qyrymdy moıyndaýdy surap jatqan joq. Olardy buǵan eshkim májbúrlegen joq. Ol tek bul qatygez soǵystyń tym uzaqqa sozylǵanyn moıyndap, kelissóz ústeline otyrýdy surap otyr. Jaqsy mámile jasaý úshin eki tarap ta narazy bolýy kerek. Ókinishke qaraı, prezıdent Zelenskıı bul beıbit kelissózderdi baspasóz arqyly joqqa shyǵarýǵa tyrysýda. Bul kelissózder jabyq túrde ótýi tıis", – dedi Aq úıdiń baspasóz hatshysy Kerolaın Levıtt.
Onyń aıtýynsha, Donald Tramp "kóńili qalǵan, tózimi taýsylyp keledi". Levıtt eki tarap ta ymyraǵa kelýge daıyn bolýy kerek ekenin aıtyp, "alaıda prezıdent Zelenskıı durys baǵytta emes sııaqty" dedi.
“Zelenskııge AQSh-tyń beıbit josparymen kelisýdi Tramp ýltımatıvti túrde talap etti me” degen suraqqa Levıtt: "Kúnniń sońyna deıin emes. Biraq prezıdenttiń kóńili qalyp otyr jáne ol bul jaǵdaıdyń aıaqtalǵanyn qalaıdy", – dep jaýap berdi.
Buǵan deıin Vladımır Zelenskıı Ýkraına atysty toqtatqannan keıin Reseımen "kez kelgen formatta" kelissózge daıyn ekenin málimdegen bolatyn.
Sondaı-aq saıasatker Kıev Qyrymnyń anneksııasyn zańdy túrde eshqashan moıyndamaıtynyn aıtty. AQSh memlekettik hatshysy Zelenskıı Qyrymdy Reseıdiń jeri dep taný máselesin talqylaýdan bas tartqan soń, Londonda ótetin Ýkraına boıynsha kelissózderge qatysýdan bas tartty. Nátıjesinde brıtan astanasynda Ulybrıtanııa men Ýkraına qorǵanys jáne syrtqy ister mınıstrleriniń kelissózderi ótti.
