مادەنيەت جانە اقپارات ءمينيسترى ايدا بالاەۆا ۇكىمەت وتىرىسىندا يۋنەسكو اياسىندا مادەني مۇرانى ساقتاۋ جانە ىلگەرىلەتۋ ماسەلەسىن كوتەردى. ءمينيستردىڭ ايتۋىنشا، ەلىمىزدەگى تاريحي-مادەني مۇرالار جەتكىلىكتى بولعانىمەن، حالىقارالىق ستاندارتتارعا ساي ساقتاۋ مەن قورعاۋ جۇمىستارى كەمشىن ءتۇسىپ جاتىر.
قازىرگى تاڭدا قازاقستاندا 25 مىڭنان استام تاريحي-مادەني مۇرا نىسانى تىركەلگەن. ونىڭ ىشىندە رەسپۋبليكالىق ماڭىزى بار 265, جەرگىلىكتى ماڭىزى بار 12 مىڭنان استام ەسكەرتكىش بار. ال يۋنەسكو-نىڭ بۇكىلالەمدىك مۇرا تىزىمىنە ەلىمىزدىڭ 10 تاريحي-مادەني ەسكەرتكىشى ەنگىزىلگەن.
مينيسترلىك ماتەريالدىق ەمەس مادەني مۇرا ەلەمەنتتەرىنىڭ ۇلتتىق ءتىزىمىن 45-تەن 79-عا دەيىن ارتتىرعان. بۇگىنگى تاڭدا قازاقستان اتىنان ادامزاتتىڭ ماتەريالدىق ەمەس مادەني مۇراسى تىزىمىنە 14 ەلەمەنت ەنگەن.
الايدا، بالاەۆانىڭ ايتۋىنشا، بۇل سالادا بىرقاتار ماسەلە شەشىلمەي كەلەدى.
مىسالى، تالعار، قارامەرگەن، قويلىق، اقتوبە، قۇلان، قوستوبە، ورنەك قالاشىقتارى مەن اقىرتاس سارايى كەشەنىنىڭ جاعدايى سىن كوتەرمەيدى.
"بىرىنشىدەن، قازىر يۋنەسكو كونۆەنتسيالارى مەن ۇسىنىمدارى بويىنشا مىندەتتەمەلەر تولىق ورىندالماي وتىر. الماتى وبلىسىنداعى تالعار مەن قارامەرگەن، جەتىسۋ وبلىسىنداعى قويلىق، جامبىل وبلىسىنداعى اقتوبە، قۇلان، قوستوبە جانە ورنەك سەكىلدى قالاشىقتاردىڭ، اقىرتاس سارايى كەشەنىنىڭ ينفراقۇرىلىمدارىن دامىتۋ – وتە وزەكتى", - دەيدى بالاەۆا.
سونىمەن قاتار، قوجا احمەت ياساۋي كەسەنەسىنىڭ بۋفەرلىك ايماعىندا كەلىسىلمەگەن قۇرىلىس جۇمىستارى توقتاماي تۇر. بۇدان بولەك، قۇلان مەن قويلىق قالاشىقتارى اۋماعىندا دا زاڭسىز قۇرىلىس پەن تازالىق ماسەلەسى وزەكتى كۇيىندە قالىپ وتىر.
مينيستر اكىمدىكتەردى تاريحي ەسكەرتكىشتەرگە جاۋاپكەرشىلىكپەن قاراۋعا شاقىردى.
ونىڭ ايتۋىنشا، حالىقارالىق ماڭىزى بار نىساندار وبلىس اۋماقتارىندا ورنالاسقاندىقتان، ولاردى ساقتاۋ مەن دامىتۋ جەرگىلىكتى اكىمدىكتەردىڭ تىكەلەي مۇددەسىنە اينالۋى ءتيىس.
تەكتۇرماس پەن جوشى حان كەسەنەلەرىنىڭ دە جاي-كۇيى مەملەكەت تاراپىنان ەرەكشە باقىلاۋدى قاجەت ەتەدى، – دەدى ايدا بالاەۆا.
