قر پرەمەر-ءمينيسترىنىڭ ورىنباسارى ەرمەك كوشەرباەۆ قازاقستانعا ارنايى شاقىرتۋمەن كەلگەن حالىقارالىق باسكەتبول فەدەراتسياسىنىڭ (FIBA) باس حاتشىسى، 2028 جىلعى لوس-اندجەلەس وليمپياداسىنىڭ ۇيلەستىرۋ كوميسسياسىنىڭ مۇشەسى اندرەاس زاگليسپەن رەسمي كەزدەسۋ وتكىزدى.
كەزدەسۋگە قر تۋريزم جانە سپورت ءمينيسترى ەربول مىرزابوسىنوۆ، سونداي-اق قازاقستان باسكەتبول فەدەراتسياسىنىڭ پرەزيدەنتى اباي الپامىسوۆ قاتىستى.
جيىندا تاراپتار قازاقستاندا جانە حالىقارالىق دەڭگەيدە باسكەتبول سپورتىن دامىتۋ ماسەلەلەرىن تالقىلادى. اسىرەسە ۇلتتىق فەدەراتسيالاردىڭ الەۋەتىن ارتتىرۋعا باعىتتالعان FIBA Plus باعدارلاماسىنىڭ قازاقستاندا جۇزەگە اسىرىلۋ مۇمكىندىكتەرى ءسوز بولدى. بۇل باستاما قازاقستان ۇلتتىق باسكەتبول فەدەراتسياسىمەن بىرلەسىپ ىسكە اسىرىلماق.
بۇل كەزدەسۋ مەملەكەت باسشىسى قاسىم-جومارت توقاەۆتىڭ حالىقارالىق سپورت ۇيىمدارىمەن بايلانىستى كۇشەيتۋ جونىندەگى تاپسىرماسىن جۇزەگە اسىرۋ اياسىنداعى ماڭىزدى قادام بولىپ وتىر. پرەزيدەنت پاريج وليمپياداسى-2024 جۇلدەگەرلەرىمەن كەزدەسۋدە سپورتشىلاردىڭ باسەكەگە قابىلەتتىلىگىن ارتتىرۋ جانە الەمدىك جارىستاردى قازاقستاندا وتكىزۋ مىندەتىن قويعان بولاتىن.
وسى ماقساتتا ەلىمىزدە حالىقارالىق سپورت ۇيىمدارىمەن تۇراقتى جانە جۇيەلى ديالوگ ورناۋدا. قازاقستاندا حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر، حالىقارالىق اۋىر اتلەتيكا فەدەراتسياسىنىڭ پرەزيدەنتى مۇحاممەد دجالۋد ءال-شامماري، حالىقارالىق سۋ سپورتى فەدەراتسياسىنىڭ پرەزيدەنتى حۋسەين ءال-مۋساللام جانە بىرىككەن كۇرەس الەمى (UWW) ۇيىمىنىڭ پرەزيدەنتى نەناد لالوۆيچ ساپارلاپ كەلدى. ولار ەلدەگى سپورت ينفراقۇرىلىمىمەن تانىسىپ، قازاقستانمەن ستراتەگيالىق ارىپتەستىكتى نىعايتۋ ماسەلەلەرىن تالقىلاعان بولاتىن.
ەندى قازاقستانعا كوماندالىق، ويىن سپورت تۇرلەرىنىڭ وكىلدەرى دە كەلە باستايدى. ماسەلەن، وسى كۇندەرى FIBA باس حاتشىسى اندرەاس زاگليس قازاقستانعا كەلسە، ال الداعى ۋاقىتتا UEFA پرەزيدەنتى الەكساندر چەفەريننىڭ ساپارى جوسپارلانىپ وتىر.
بۇل ەلىمىزدىڭ حالىقارالىق سپورت قوعامداستىعىمەن بايلانىسىنىڭ تەرەڭدەپ كەلە جاتقانىن كورسەتەدى. قازاقستان ۇكىمەتى الداعى ۋاقىتتا دا وسىنداي جوعارى دەڭگەيدەگى كەلىسسوزدەر ارقىلى قازاقستان سپورتىنىڭ الەۋەتىن كۇشەيتىپ، الەمدىك ارەناداعى بەدەلىن ارتتىرۋدى جالعاستىرا بەرەدى.
