ءۇندىستاننىڭ بايساران اڭعارىندا لاڭكەستىك شابۋىل جاسالدى. كۋاگەرلەردىڭ ايتۋىنشا، كامۋفلياج كيگەن ەكى قارۋلى ادام تۋريستەرگە وق جاۋدىرعان، دەپ حابارلايدى "ادىرنا" ۇلتتىق پورتالى ءۇندىستان تەلەارناسىنا سىلتەمە جاساپ.
ولار اتپەن سەرۋەندەپ جۇرگەن تۋريستەرگە باعىتسىز وق اتقان.
News18 India تەلەارناسىنىڭ حابارلاۋىنشا، شابۋىل جاساعانداردىڭ «لاشكار-ە-تايبا» ۇيىمىمەن بايلانىسى بولۋى مۇمكىن.
وقيعا سالدارىنان كەم دەگەندە 27 ادام قازا تاۋىپ، تاعى 12 ادام جارالانعان. دارىگەرلەردىڭ مالىمەتىنشە، جارالانعانداردىڭ جاعدايى تۇراقتى.
جارالانعانداردىڭ ءتىزىمى بويىنشا، ولاردىڭ بارلىعى ءۇندىستان ازاماتتارى ەكەنى بەلگىلى بولدى.
ايماق باسشىسى ومار ابدۋللانىڭ ايتۋىنشا، قازا تاپقانداردىڭ ناقتى سانى ازىرگە رەسمي تۇردە راستالماعان. قازىر وڭىردە لاڭكەستەرگە قارسى ارنايى وپەراتسيا جۇرگىزىلۋدە. قاندى وقيعا تۋريستەر كوپ جينالاتىن پاحالگام قالاسىندا بولعان. الدىن الا مالىمەت بويىنشا، قارۋلى سودىرلار توپتانىپ بەيبىت حالىققا وق جاۋدىرعان.
«بۇل سوڭعى جىلدارداعى بەيبىت تۇرعىندارعا جاسالعان ەڭ ءىرى شابۋىل،» – دەپ جازدى ومار ابدۋللا الەۋمەتتىك جەلىدەگى پاراقشاسىندا.
ءۇندىستان پرەمەر-ءمينيسترى نارەندرا مودي پاحالگامداعى تەراكتىنى قاتاڭ ايىپتاپ، قازا بولعانداردىڭ وتباسىنا كوڭىل ايتتى جانە جارالانعاندارعا تەز ساۋىعىپ كەتۋدى تىلەدى.
«بۇل جانتۇرشىگەرلىك ارەكەتتى ۇيىمداستىرعاندار جاۋاپسىز قالمايدى! ءبىز تەرروريزمدى ءتۇپ-تامىرىمەن جويۋعا بەل بۋىپ وتىرمىز»، – دەپ مالىمدەدى مودي الەۋمەتتىك جەلىدەگى ۇندەۋىندە.
ۇندىستانعا ساپارلاپ بارعان اقش ۆيتسە-پرەزيدەنتى دجەي دي ۆەنس تە ءۇندى حالقىنا قايعىرىپ كوڭىل ايتتى.
