رەسەي پرەزيدەنتى ۆلاديمير پۋتين ءساۋىر ايىنىڭ باسىندا دونالد ترامپتىڭ وكىلى ستيۆ ۋيتكوففپەن كەزدەسۋدە اقش-قا ۋكرايناداعى ۇرىس قيمىلدارىن قازىرگى مايدان شەبى بويىمەن توقتاتۋدى ۇسىندى. بۇل تۋرالى Financial Times باسىلىمى بىرنەشە دەرەككوزگە سىلتەمە جاساپ جازدى، دەپ حابارلايدى "ادىرنا" ۇلتتىق پورتالى.
كەزدەسۋ بارىسىندا پۋتين ماسكەۋ قازىرگى ۋاقىتتا كيەۆتىڭ باقىلاۋىنداعى ۋكراينا ايماقتارىنا قاتىستى كەيبىر اۋماقتىق تالاپتارىنان باس تارتۋى مۇمكىن ەكەنىن دە مالىمدەدى. بۇل — سوعىس باستالعالى بەرى رەسەيدىڭ ءوز ماكسيماليستىك ۇستانىمدارىنان باس تارتۋعا دايىن ەكەندىگىن بىلدىرەتىن العاشقى رەسمي يشارا رەتىندە قاراستىرىلىپ وتىر.
الايدا ەۋروپالىق شەنەۋنىكتەر بۇل ۇسىنىستى ساقتىقپەن قابىلداۋدا. ولار ءپۋتيننىڭ بۇل ارەكەتىن ترامپتى رەسەيدىڭ باسقا تالاپتارىن قابىلداۋعا كوندىرىپ، ولاردى ۋكرايناعا كۇشتەپ تاڭۋ ءۇشىن جاسالعان ايلا بولۋى مۇمكىن دەپ سانايدى.
سونداي-اق، اق ءۇي ستيۆ ۋيتكوففتىڭ وسى اپتا سوڭىندا رەسەيگە تاعى ءبىر ساپار جاسايتىنىن رەسمي تۇردە راستادى.
