اقتاۋ تۇرعىندارى اسپاندا جارقىراپ قۇلاعان بەلگىسىز وبەكتىنى بايقاپ، ونى ۆيدەوعا ءتۇسىرىپ ۇلگەرگەن. الەۋمەتتىك جەلىلەردە تاراعان كادرلاردان جىلدام قۇلاپ بارا جاتقان جارىق نۇكتەنى كورۋگە بولادى. جەلى قولدانۋشىلارى بۇل قۇبىلىستىڭ نە ەكەنىن بولجاي الماي، ءتۇرلى پىكىرلەر ايتۋدا.
الايدا كوپ ۇزاماي بۇل قۇبىلىستىڭ ناقتى نە ەكەنى بەلگىلى بولدى. 20 ءساۋىر كۇنى ماسكەۋ ۋاقىتىمەن 04:20-دا «سويۋز مس-26» عارىش كەمەسىنىڭ قايتۋ كاپسۋلاسى جەزقازعان قالاسى ماڭىنا ءساتتى قونعان. اسپانداعى كورىنىس — ءدال وسى كاپسۋلانىڭ اتموسفەرا قاباتتارىنا ەنۋ كەزىندە پايدا بولعان قۇبىلىس ەكەنى انىقتالدى.
كاپسۋلادا «روسكوسموس» عارىشكەرلەرى الەكسەي وۆچينين، يۆان ۆاگنەر جانە NASA استروناۆتى دونالد پەتتيت بولدى. ولار حالىقارالىق عارىش ستانتسياسىندا ۇزاق مەرزىمدى 73-ەكسپەديتسيا اياسىندا جۇمىس ىستەپ، 2024 جىلدىڭ قىركۇيەك ايىنان باستاپ 43 عىلىمي-قولدانبالى تاجىريبە جۇرگىزگەن. سونىمەن قاتار، عارىشكەرلەر اشىق عارىشقا شىعىپ، ءبىر پيلوتتى جانە ەكى جۇك كەمەسىن قابىلداعان.
فوتو: روسكوسموسقايتۋ كاپسۋلاسى حعس-نىڭ رەسەي سەگمەنتىندەگى «راسسۆەت» مودۋلىنەن ءساتتى ءبولىنىپ، وربيتادان شىعىپ، جەرگە قونۋ كەزەڭىن قالىپتى رەجيمدە وتكەردى.
ايتا كەتەيىك، قازىرگى تاڭدا حالىقارالىق عارىش ستانتسياسىندا 73-ۇزاق مەرزىمدى ەكسپەديتسيانىڭ ەكيپاجى جۇمىسىن جالعاستىرىپ جاتىر. وندا «روسكوسموس» عارىشكەرلەرى سەرگەي رىجيكوۆ، الەكسەي زۋبريتسكي، كيريلل پەسكوۆ، NASA استروناۆتتارى دجوناتان كيم، ەنن ماككلەين، نيكول ايەرس جانە JAXA (جاپونيا) استروناۆتى تاكۋيا ونيسي بار.
