19 ساۋىردە اقش-تىڭ ءىرى قالالارىندا ەل پرەزيدەنتى دونالد ترامپتىڭ ساياساتىنا قارسى جاپپاي نارازىلىق شارالارى ءوتتى. اكتسياعا قاتىسۋشىلار اق ءۇي باسشىسىن اۆتوريتارلىق باسقارۋ ءستيلى مەن زاڭسىز ميگرانتتاردى ءتيىستى سوت پروتسەستەرىنسىز ەلدەن شىعارىپ جاتقانى ءۇشىن ايىپتادى، دەپ حابارلايدى “ادىرنا” ۇلتتىق پورتالى DW سايتىنا سىلتەپ.
ۆاشينگتون قالاسىندا جۇزدەگەن ادام اق ءۇيدىڭ الدىنا جينالدى. نارازىلىق بىلدىرۋشىلەردىڭ پلاكاتتارىندا «پاتشاعا جول جوق» جانە «ترامپقا يمپيچمەنت» دەگەن جازۋلار بولدى.
اكتسياعا قاتىسۋشى بەندجامين دۋگلاس AFP اگەنتتىگىنە بەرگەن سۇحباتىندا: «اكىمشىلىك زاڭ ۇستەمدىگى پرينتسيپىنە تىكەلەي شابۋىل جاساپ جاتىر»، – دەدى.
ول پالەستينالىق بەلسەندى ستۋدەنتتى بوساتۋعا شاقىرعان پلاكات ۇستاپ شىقتى. ونىڭ ايتۋىنشا، بيلىك جەكەلەگەن ادامداردى كسەنوفوبيانى قوزدىرۋ جانە قۇقىقتىق كەپىلدىكتەردى بۇزۋ ءۇشىن پايدالانۋدا.
نيۋ-يورك قالاسىندا نارازىلىق بىلدىرۋشىلەر قوعامدىق كىتاپحانا عيماراتىنا جينالدى.
«ءبىز ۇلكەن قاۋىپ استىندامىز»، 73 جاستاعى نارازىلىققا قاتىسۋشى كەتي ۆالي.
ونىڭ ايتۋىنشا، اتا-اناسىنىڭ ادولف گيتلەردىڭ بيلىككە كەلۋى تۋرالى اڭگىمەلەرى قازىرگى جاعدايعا وتە ۇقساس.
سان-فرانتسيسكودا جۇزدەگەن ادام مۇحيت جاعاجايىنا جينالىپ، دەنەلەرىمەن IMPEACH + REMOVE (“يمپيچمەنت + توقتاتۋ”) سوزدەرىن قۇرادى، دەپ حابارلايدى San Francisco Chronicle. باسقا نارازىلىق بىلدىرۋشىلەر قايعى-قاسىرەتتىڭ ءداستۇرلى سيمۆولى - توڭكەرىلگەن امەريكاندىق تۋدى ۇستادى.
سەنبىلىك نارازىلىق شارالارىنىڭ باستى ۇيىمداستىرۋشىسى — 50501 توبى بولدى. بۇل اتاۋ 50 شتاتتاعى 50 نارازىلىقتى جانە ءبىرتۇتاس قوزعالىستى بىلدىرەدى، دەپ ناقتىلايدى AFP. توپ ءوز سايتىندا 19 ساۋىردە شامامەن 400 اكتسيا ۇيىمداستىرىلعانىن جانە بۇل شارالاردىڭ بەيبىت سيپاتتا ءوتۋىنىڭ ماڭىزدىلىعىن اتاپ ءوتتى.
