ماسكەۋدەگى «بودروست» مونشاسىندا قىرعىزداردى ۇستاۋدىڭ قاتال ادىستەرى ميگرانتتاردىڭ ءتارتىپ ساقشىلارىنا قارسىلىق كورسەتۋىمەن تۇسىندىرىلەدى. بۇل تۋرالى رەسەيدىڭ ءسىم رەيد كەزىندە «شامادان تىس كۇش قولدانۋ» تۋرالى الەۋمەتتىك جەلىدەگى اقپاراتقا تۇسىنىكتەمە بەرە وتىرىپ، ريا نوۆوستي جاريالادى، دەپ حابارلايدى “ادىرنا” ۇلتتىق پورتالى.
«بار مالىمەتكە سايكەس، وپەراتسيا بارىسىندا شەتەل ازاماتتارى قۇقىق قورعاۋ قىزمەتكەرلەرىنە قارسىلىق كورسەتكەن. سول سەبەپتى بۇل شەتەلدىكتەرگە قاتىستى ءتيىستى شارالار قولدانىلعان. بۇل رەتتە كۇش قۇرىلىمدارى وكىلدەرى رەسەي زاڭناماسى اياسىندا جانە ءوز قۇزىرەتى شەڭبەرىندە ارەكەت ەتتى»، – دەدى ءسىم وكىلدەرى.
مينيسترلىك بۇل تەكسەرۋ جوسپارلى بولعانىن جانە ناقتى ءبىر ەلدىڭ ازاماتتارىنا باعىتتالماعانىن اتاپ ءوتتى. رەيد بارىسىندا 59 شەتەل ازاماتى ۇستالعان، ولاردىڭ 25-ءى رەسەيدە كوشى-قون زاڭناماسىن بۇزىپ جۇرگەن. ءسىم مالىمەتىنشە، ۇستالعانداردىڭ كەيبىرى راديكالدى توپتارمەن بايلانىستا دەگەن كۇدىككە ىلىنگەن.
وسى ارادا قىرعىزستاننىڭ ادام قۇقىقتارى جونىندەگى ۋاكىلى جاميليا جامانباەۆا رەسەيلىك ارىپتەسى تاتيانا موسكالكوۆامەن كەزدەسۋدە «بودروست» مونشاسىنداعى كۇش قولدانۋدىڭ «قالىپقا ساي بولۋىنا» الاڭداۋشىلىق ءبىلدىردى.
«بەينەجازبالاردى قاراۋ كەزىندە قىرعىز رەسپۋبليكاسىنىڭ ازاماتتارىن جاپپاي ۇستاۋ بارىسىندا كۇش قولدانۋدىڭ سايكەستىگى مەن نەگىزدىلىگى تۋرالى سۇراقتار تۋىندايدى. قىرعىزستان ازاماتتارىنا قاتىستى قانداي دا ءبىر اكىمشىلىك نەمەسە كۇشتىك شارالار ولاردىڭ پروتسەسسۋالدىق قۇقىقتارىنىڭ كەپىلدىگى مەن حالىقارالىق مىندەتتەمەلەردى ساقتاي وتىرىپ جۇرگىزىلۋى كەرەك. قىرعىزستان – ەۋرازيالىق ەكونوميكالىق وداقتىڭ تولىققاندى مۇشەسى»، – دەدى جامانباەۆا.
موسكالكوۆا بۇل وقيعاعا ءوزى دە نازار اۋدارعانىن، ونىڭ وتىنىشىنەن كەيىن رەسەيدىڭ پروكۋراتۋراسى مەن كوشى-قون ورگاندارى «بودروستتاعى» جاعدايعا بايلانىستى تەكسەرۋ باستاعانىن ايتتى.
ايتا كەتەيىك، وقيعا 10 ءساۋىر كۇنى، قىرعىزستان تۋماسى ءارى رەسەي ازاماتتىعىن العان ادامنىڭ مەنشىگىندەگى مونشا كەشەنىندە ورىن العان. جاريالانعان فوتو جانە بەينەجازبالاردا ارنايى جاساق ساربازدارىنىڭ مونشا قوناقتارىن ۇرىپ، ولاردى بەتىمەن جەرگە جاتقىزىپ، ەڭبەكتەتىپ نەمەسە تىزەرلەتە جىلجىتىپ جۇرگەنى، جەردە جاتقان ادامداردىڭ ۇستىمەن باسىپ وتكەندەرى كورىنەدى.
وسىعان بايلانىستى رەسەيدىڭ قىرعىزستانداعى ەلشىسى سەرگەي ۆاكۋلوۆ قىرعىزستان ءسىم-نە شاقىرىلىپ، وعان قىرعىز ازاماتتارىن قاتاڭ ۇستاۋعا بايلانىستى تۇسىنىكتەمە بەرۋ تالابى بار نوتا تابىستالدى. رەسەي تاراپىنا سونداي-اق قىرعىزستان ازاماتتارىنىڭ قۇقىقتارىن قورعاۋعا ناقتى شارالار قابىلداۋ جانە مۇنداي جاعدايلاردىڭ قايتالانۋىنا جول بەرمەۋ قاجەتتىگى ايتىلدى، ويتكەنى بۇل جاعداي قىرعىز-رەسەيلىك وداقتاستىق پەن ستراتەگيالىق ارىپتەستىك قارىم-قاتىناستارعا نۇقسان كەلتىرۋى مۇمكىن.
قىرعىزستاننىڭ ماسكەۋدەگى ەڭبەك، الەۋمەتتىك قامسىزداندىرۋ جانە كوشى-قون مينيسترلىگىنىڭ وكىلدىگى رەسەيدىڭ باس پروكۋراتۋراسىنا، ءىىم-گە، ماسكەۋ پروكۋراتۋراسىنا، رەسەيلىك ومبۋدسمەنگە جانە باسقا دا مەكەمەلەرگە وسى وقيعاعا بايلانىستى شارا قابىلداۋ جونىندە ءوتىنىش جولدادى.
