بىشكەكتە 2019 جىلدىڭ تامىز ايىندا كوي-تاش وقيعاسىنا قاتىستى قىرعىزستاننىڭ بۇرىنعى پرەزيدەنتى المازبەك اتامباەۆ پەن تاعى بىرنەشە ادامنىڭ ۇستىنەن سوت پروتسەسى ءوتىپ جاتىر. بىرنەشە ساعات بويى ايىپتاۋمەن تانىسقان پروكۋرور ەكس-پرەزيدەنتتى 11 جىلعا باس بوستاندىعىنان ايىرۋدى سۇرادى، دەپ حابارلايدى “ادىرنا” ۇلتتىق پورتالى 24.kg سايتىنا سىلتەپ.
سونداي-اق ايىپتاۋشى تاراپ اتامباەۆتىڭ بۇرىنعى كۇزەتشىسى قانات ساعىمباەۆتى 11,5 جىلعا باس بوستاندىعىنان ايىرۋدى ۇسىندى. پرەزيدەنت اكىمشىلىگىنىڭ بۇرىنعى باسشىسى فاريد نيازوۆ، پارلامەنتتىڭ بۇرىنعى دەپۋتاتى راۆشان جەەنبەكوۆ جانە اتامباەۆتىڭ پارتيالاسى فارحات باابيەۆ ارقايسىسىن 10 جىلعا باس بوستاندىعىنان ايىرۋدى سۇرادى.
قوي-تاش وقيعاسىنا قاتىستى ءىس ەكى ە ىسپەن – زاڭسىز جەر تەلىمدەرى مەن بىشكەك جەو-نا كومىر جەتكىزۋگە قاتىستى ىستەرمەن بىرىكتىرىلگەن.
المازبەك اتامباەۆ 2011 جىلدان 2017 جىلعا دەيىن قىرعىزستان پرەزيدەنتى قىزمەتىن اتقاردى. فەرعانا اگەنتتىگىنىڭ مالىمەتىنشە، بيلىكتى سوورونباي جەەنبەكوۆكە تاپسىرعاننان كەيىن ولاردىڭ قارىم-قاتىناسى بۇزىلىپ، اتامباەۆ وپپوزيتسياعا ءوتتى. 2019 جىلى ونىڭ قول سۇعىلماۋشىلىق مارتەبەسى الىنىپ، وعان بىرنەشە قىلمىستىق ايىپ تاعىلدى، سونىڭ ىشىندە قىلمىستىق اۆتوريتەت ازيز باتۋكاەۆتى زاڭسىز بوساتۋ ءىسى بار.
2019 جىلدىڭ 7 تامىزىندا ۇقك ارنايى جاساعى اتامباەۆتى تەرگەۋگە الىپ كەلۋ ءۇشىن ونىڭ رەزيدەنتسياسىن شابۋىلمەن الۋعا ارەكەت جاسادى. الايدا ونىڭ جاقتاستارى قارسىلىق كورسەتىپ، ءبىر ارنايى جاساق جاۋىنگەرى قازا تاۋىپ، التاۋى تۇتقىنعا الىندى.
كەلەسى كۇنى كۇشتىك قۇرىلىمدار ەكىنشى وپەراتسيا جۇرگىزىپ، اتامباەۆتى ۇستادى. قاقتىعىس كەزىندە ەكس-پرەزيدەنتتىڭ جاقتاستارى ءورت شىعارىپ، كۇش قۇرىلىمدارىنىڭ قىزمەتكەرلەرىنە تاس لاقتىرعان. 7-8 تامىز كۇندەرى بولعان وقيعالار كەزىندە 225 ادام زارداپ شەكتى، ونىڭ ىشىندە 91 ءىىم قىزمەتكەرى مەن 40 ۇقك قىزمەتكەرى بار.
2020 جىلدىڭ ماۋسىمىندا اتامباەۆ باتۋكاەۆتى زاڭسىز بوساتتى دەپ تانىلىپ، 11 جىل 2 ايعا باس بوستاندىعىنان شەكتەتىلدى. مۇلكى تاركىلەنىپ، مەملەكەتتىك ناگرادالارىنان ايىرىلدى. 2023 جىلدىڭ 13 اقپانىندا قىرعىزستاننىڭ جوعارعى سوتى جاڭا اشىلعان ءمان-جايلارعا بايلانىستى ۇكىمدى جويدى. كەلەسى كۇنى اتامباەۆقا شەتەلگە شىعۋعا رۇقسات بەرىلدى.
2023 جىلدىڭ 14 اقپانىندا كەشكە ول تۇرمەدەن بوساتىلىپ، كەلەسى كۇنى شەتەلگە ەمدەلۋگە ۇشىپ كەتتى.
