2025 جىلعى 4-14 ءساۋىر ارالىعىندا سەربيانىڭ زلاتيبور قالاسىندا مەكتەپ وقۋشىلارىنا ارنالعان ءداستۇرلى ISF U15 سپورت فەستيۆالى ءوتتى. اۋقىمدى دوداعا الەمنىڭ 55 ەلىنەن 2 500-دەن استام جاس سپورتشى جينالدى. ءتۇرلى سپورت تۇرلەرى بويىنشا ءوزارا باق سىناسقان جاس سپورتشىلار اراسىنان وتانداستارىمىز توپ جاردى، دەپ حابارلايدى «ادىرنا» ۇلتتىق پورتالى.
قازاقستان اتىنان جارىسقا 22 سپورتشى قاتىسىپ، بوكس، ەركىن كۇرەس، دزيۋدو جانە شاحمات سەكىلدى سپورت تۇرلەرىندە ەل نامىسىن ابىرويمەن قورعادى. سولاردىڭ 12-ءسى – تيمۋر قۇلىباەۆتىڭ باستاماسىمەن جانە «Halyk» قايىرىمدىلىق قورىنىڭ قولداۋىمەن جۇزەگە اسىرىلىپ جاتقان Auyl Sport جوباسىنىڭ جەڭىمپازدارى بولاتىن.
سەربيا تورىندەگى جارقىن جەڭىس
گيمنازيادانىڭ قورىتىندىسى بويىنشا، قازاقستان قۇراماسى جالپى ەسەپتە 11 مەدال يەلەندى. ونىڭ ىشىندە Auyl Sport سپورتشىلارى ءتورت بىردەي جۇلدەنى قانجىعالارىنا بايلاپ، ەل ابىرويىن اسقاقتاتتى.
اتاپ ايتقاندا، بوكستان وتكەن تارتىستى باسەكەدە 19 ەلدەن كەلگەن 160 سپورتشىنىڭ ىشىنەن 52 كەلى سالماقتا شىڭعىس ماكاروۆ، 60 كەلىدە ايبەك سادىق، جانە 57 كەلىدە نۇرتاس ءالىمباي قارسىلاستارىن قاپى قالدىرىپ، التىن مەدالعا قول جەتكىزدى. بۇل ءۇش سپورتشى دا 2024 جىلعى Auyl Sport جوباسىنىڭ ۇزدىكتەرى ەكەنىن اتاپ وتكەن ءجون.
بۇگىن، 15 ءساۋىر كۇنى الماتىداعى قازاق سپورت جانە تۋريزم اكادەمياسى عيماراتىندا جۇلدەمەن ورالعان سپورتشىلاردى جانە ولاردىڭ جاتتىقتىرۋشىلارىن ماراپاتتاۋ ءراسىمى ءوتتى. ءىس-شاراعا Halyk قورىنىڭ اتقارۋشى ديرەكتورى عالىمبەك جاقسىلىقوۆ، بوكسشى، حالىقارالىق سپورت شەبەرى، سيدنەي وليمپياداسىنىڭ جەڭىمپازى ەرماحان ىبىرايىموۆ، قازاق سپورت جانە تۋريزم اكادەمياسىنىڭ تاربيە جانە سپورت جۇمىسى جونىندەگى پرورەكتورى مۇحتار ەسقاليەۆ جانە وزگە دە سپورت جاناشىرلارى قاتىستى.
«Auyl Sport جوباسى اۋىلداعى تالانتتى بالالارعا ۇلكەن ارەناعا شىعۋعا جول اشىپ وتىر. بۇل – جاي عانا سپورتتىق جوبا ەمەس، ناعىز الەۋمەتتىك ليفت، اۋىل بالاسىنىڭ ارمانىن اقيقاتقا اينالدىراتىن مۇمكىندىك. گيمنازياداداعى جەتىستىكتەر – وسى ماقساتتىڭ ورىندالعانىنا دالەل»، دەيدى Halyk قورىنىڭ اتقارۋشى ديرەكتورى عالىمبەك جاقسىلىقوۆ.
ەركىن كۇرەستەن تۇركىستان وبلىسىنىڭ تۋماسى نۇرقوجا قالىبەك قولا مەدال يەلەندى. راپيد جانە بليتس فورماتىندا وتكەن شاحمات سايىسىنا 17 ەلدەن 100-دەن استام شاحماتشى قاتىستى. اقىل وي دوداسىندا Auyl Sport جوباسىنىڭ وكىلدەرى – جانات نۇرىم مەن ولتيناي العاپپاروۆا جوعارى دەڭگەيدەگى ويىن كورسەتىپ، ۇيىمداستىرۋشىلار تاراپىنان ارنايى ماراپاتتارعا يە بولدى.
سپورتشىلار لەبىزى
بوكستان 60 كەلى سالماقتا ۇزدىك اتانعان اقمولا وبلىسىنىڭ 14 جاستاعى جاس سپورتشىسى ايبەك سادىق جارىس جايلى ءوز ويىن ءبولىستى. جارتىلاي فينالدا سول قولىنان جاراقات العان ايبەك ءبىر قولىمەن عانا جۇدىرىقتاسسا دا، قارسىلاسىن سان سوقتىردى.
«بوكسپەن اينالىسقانىما ءتورت جىلدان اسا ۋاقىت بولدى. «Auyl Sport» جوباسىنا وڭىرلىك جانە رەسپۋبليكالىق كەزەڭدەردەن ءوتىپ كەلدىم. باپكەرلەرگە، جوبا ۇيىمداستىرۋشىلارىنا جانە بارلىق قولداۋ بىلدىرگەن جاقىندارىما التىنمەن كەلەمىن دەپ ۋادە بەرگەن بولاتىنمىن. سول ۋادەمدە ورىندادىم. قۋانىشتىمىن. جاس سپورتشىلاردى، اسىرەسە اۋىلدان شىققان دارىنداردى قولداپ وتىرعان «Auyl Sport» جوباسىنا العىسىم شەكسىز. ناعىز چەمپيوندار – اۋىلدا! بۇيىرسا مەن دە وليمپيادا چەمپيونى بولىپ، كوك تۋىمىزدى بيىكتە جەلبىرەتۋدى ماقسات تۇتامىن» دەدى ايبەك سادىق.
بالالارىنىڭ جارقىن جەتىستىگىنە كۋا بولعان اتا-انالار دا قۋانىشىن جاسىرمادى. شاحماتتان باق سىناعان ولتيناي العاپپاروۆانىڭ اكەسى ءانۋار ابديەۆ تە جوبا جەتەكشىلەرىنە العىسىن ءبىلدىردى.
«بۇل ءبىز ەستىمەگەن، كۇتپەگەن دۇنيە. قاراپايىم اۋىلدان شىققان جاس تالانتتاردى شەتەلگە اپارىپ، ەل نامىسىن قورعاۋعا مۇمكىندىك بەرىپ وتىرعان «Halyk» قايىرىمدىلىق قورىنا راقمەت ايتامىز. بالالارىمىزدىڭ ءار جەتىستىگىنە شىنايى قۋانىپ، ءار جارىستى تاقىمىمىزدى قىسىپ، تىلەكتەس بولىپ وتىرامىز. بالامىزدىڭ جەتىستىگىن كورۋ، ونىڭ ۇلكەن تاجىريبە الىپ، ەل كورىپ، جەر كورىپ كەلگەنىنە ءبىز اتا-انا رەتىندە شىنايى قۋانىشتىمىز» دەدى ول.
مىڭداعان اۋىل بالاسىنا مۇمكىندىك بەرگەن جوبا
Auyl Sport جوباسىنىڭ نەگىزگى ماقساتى – اۋىل بالالارى مەن جاسوسپىرىمدەرىن سپورتقا تارتۋ، سپورتتى ناسيحاتتاۋ، بۇقارالىق سپورتتى دامىتۋ، جاتتىقتىرۋشىلاردىڭ بىلىكتىلىگىن ارتتىرىپ، ولاردى جاڭا داعدىلارعا بەيىمدەۋ. 2024 جىلى ەلگە تانىستىرىلىپ وڭىرلەردەن جاس دارىنداردى جيناقتاعان جوبا بۇگىندە جارتى جىل ىشىندە ءوز ناتيجەسىن بەردى. سەربيا ەلىندەگى جارىستا ەل نامىسىن ابىرويمەن قورعاپ، حالىقارالىق ارەنادان جۇلدەمەن ورالعان اۋىل سپورتشىلارى دا ەلەۋسىز قالمادى. جاس چەمپيوندار مەتسەنات تيمۋر قۇلىباەۆتىڭ اتىنان العىس حاتتارمەن قاتار، اقشالاي سىياقىلارمەن ماراپاتتالدى.
اتاپ ايتقاندا التىن مەدال يەگەرلەرىنە – 1 ميلليون تەڭگەدەن، قولا جۇلدەگەرگە – 300 مىڭ تەڭگە، شاحماتتان جوعارى ناتيجە كورسەتكەن جاس زياتكەرلەرگە – 200 مىڭ تەڭگەدەن تابىستالدى. چەمپيونداردى جاتتىقتىرعان باپكەرلەر دە لايىقتى تۇردە اقشالاي سىيلىقپەن باعالاندى.
ايتا كەتەيىك، بىلتىر عانا تۇساۋى كەسىلگەن Auyl Sport جوباسى ارقىلى – 200-دەن استام ەلدى مەكەننەن 12 000 جاس سپورتشى وڭىرلىك تۋرنيرلەرگە قاتىسىپ، 17 وبلىستان ىرىكتەلگەن 1 300 ۇزدىك ءجاسوسپىرىم فينالدىق كەزەڭدە باق سىنادى. قازىر جوبا اياسىندا بوكس، كۇرەس، كاراتە، باسكەتبول، ۆولەيبول جانە شاحمات سپورت تۇرلەرى قامتىلعان. ال 2025 جىلدان باستاپ، جوباعا ۇستەل تەننيسى دە قوسىلماق.
جالپى، تيمۋر قۇلىباەۆ باسقاراتىن «Halyk» قايىرىمدىلىق قورى ەلدەگى الەۋمەتتىك ماسەلەلەردى شەشۋگە، حالىقتىڭ ءال-اۋقاتىن جاقسارتۋعا باعىتتالعان جوبالاردى جۇيەلى تۇردە جۇزەگە اسىرىپ كەلەدى. اۋىل سپورتىن وركەندەتۋگە قور 500 ميلليون تەڭگەگە جۋىق قاراجات بولگەن.
سۋرەتتەر: "حالىق" قايىرىمدىلىق قورى باسپاسوزىنەن
