Aqmola oblysynda ört qaupı joǧary kezeŋde baqylau küşeitıldı

Aqmola oblysynda ört qaupı joǧary kezeŋ bastalǧaly berı bır orman örtı jäne 44 şöp janu oqiǧasy tırkeldı. Jalpy ört şalǧan aumaq 689,31 gektardy qūrady. Mausym salystyrmaly türde tynyş ötse de, tötenşe jaǧdailar qyzmetı kez kelgen jaǧdaiǧa daiyn bolu üşın jūmysyn küşeitılgen rejimde jalǧastyruda. Būl turaly brifing barysynda Aqmola oblysy TJD memlekettık ört baqylau basqarmasynyŋ bas mamany azamattyq qorǧau kapitany Dosbol Jaqsybaev mälım ettı, dep habarlaidy Öŋırlık kommunikasiialar qyzmetınen. Aldyn alu maqsatynda aqparattyq-tüsındıru jūmystary keŋ kölemde jürgızılude. Örttıŋ aldyn alu jäne ört şyqqan jaǧdaida qalai äreket etu kerektıgı turaly halyqqa tüsındıru üşın öŋırlık jäne respublikalyq būqaralyq aqparat qūraldarynda 78 material jaryq kördı. «Jaŋa ört mausymynyŋ aldynda TJ departamentı jaǧdai uşyǧatyn bolsa, ıske qosylatyn küşter men qūraldardyŋ naqty tızımın bekıttı. Jalpy sany 1000-nan astam adam jäne 262 tehnika kez kelgen sätte oqiǧa ornyna jıberıluge daiyn. Olardyŋ qatarynda TJD, polisiia, tabiǧi resurstar basqarmasy, äskeri bölımder, jergılıktı atqaruşy organdar, temırjol jäne jol qyzmetınıŋ ökılderı bar. Sonymen qatar, oblysta 6 ört poiyzy bar, būl äsırese temırjol infraqūrylymyn qorǧauda maŋyzdy», – dedı spiker. Örtpen küreste erıktı jasaqtardyŋ ülesı zor. Qazırgı taŋda öŋırde 1000-nan astam adamnan qūralǧan 210 erıktı jasaq jūmys ısteidı. Būǧan qosa, 51 jergılıktı atqaruşy organnyŋ ört söndıru beketı bar. Olar alys auyldarda jäne eldı mekenderde örttıŋ alǧaşqy belgılerı baiqalǧan sätte jyldam äreket etuge tiıs. Ört oşaqtaryn erte anyqtau üşın sputniktık monitoring qoldanylady. «Qazaqstan Ǧaryş Sapary» AQ aptalyq boljammen bırge ört qaupı indeksınıŋ kartasyn ūsynady. mchs.gharysh.kz geoportaly arqyly orman qory, su közderı, ört bölımşelerı men evakuasiialyq beketter siiaqty maŋyzdy nysandardy, sondai-aq naqty jaǧdaidy qadaǧalauǧa bolady. Mūndai sifrlyq jüie tötenşe jaǧdailarda şūǧyl şeşım qabyldauǧa mümkındık beredı. Jergılıktı jerlerde jaǧdaidy 108 mobildı top baqylaidy. Būl – orman jäne dala alqaptaryn, demalys oryndaryn patruldeitın 425 qyzmetker. 22 reid barysynda ört qauıpsızdıgı erejelerın būzudyŋ bes faktısı anyqtaldy. Üş azamatqa eskertu jasaldy, al ekeuı 78 640 teŋge kölemınde aiyppūl töledı. «Aldyn aludyŋ basty şarty – är adamnyŋ jeke jauapkerşılıgı. Dala iesı, turist nemese baǧban — bärı bırdei abai boluǧa mındettı. Bır ǧana beiqam äreketten ülken ört tuyndap, onyŋ zardabyn boljau qiyn boluy mümkın. Jer jyrtu, qūrǧaq şöptı qauıpsız jaǧu, ystyq ärı jeldı künı ot jaqpau, qoqysty uaqtyly tazartu siiaqty qarapaiym erejeler köptegen gektar jerdı jäne talai adamnyŋ ömırın saqtap qaluy mümkın», – dep tüiındedı maman.