رەسەي پرەزيدەنتى ۆلاديمير پۋتين سانكت-پەتەربۋرگتە اقش پرەزيدەنتىنىڭ ارنايى وكىلى ستيۆ ۋيتكوففپەن ءتورت ساعاتقا سوزىلعان كەلىسسوز وتكىزدى، دەپ حابارلايدى "ادىرنا" ۇلتتىق پورتالى.
كرەمل تاراتقان مالىمەتكە سايكەس، كەلىسسوزدىڭ باستى تاقىرىبى — ۋكرايناداعى جاعدايدى رەتتەۋدىڭ ءتۇرلى جولدارى. كەزدەسۋ ماسكەۋ ۋاقىتىمەن 17:40-تا باستالىپ، ءتورت ساعاتتان استام ۋاقىتقا سوزىلعان.
ساپار الدىندا ستيۆ ۋيتكوفف پەتەربۋرگ قالاسىن ارالاپ شىققان. بۇل – ترامپتىڭ وكىلى مەن پۋتين اراسىنداعى ءۇشىنشى كەزدەسۋ. بۇعان دەيىن ۋيتكوفف اقپان جانە ناۋرىز ايلارىندا ماسكەۋدە بولعان ەدى.
اق ءۇي وكىلى كارولين لەۆيتتىڭ ايتۋىنشا، بۇل كەلىسسوزدەر اتىستى توقتاتىپ، اقىرعى بەيبىت كەلىسىمگە قول جەتكىزۋگە باعىتتالعان تاعى ءبىر ماڭىزدى قادام بولىپ سانالادى.
ايتا كەتەيىك، دونالد ترامپ بۇعان دەيىن پۋتينمەن كەلىسسوز جۇرگىزە الاتىن جالعىز ادام ءوزى ەكەنىن مالىمدەگەن بولاتىن.
