“ەلگە كومەك” قايىرىمدىلىق قورىنىڭ جەتەكشىسى ءىلياس ساريەۆ الاياقتىق بابى بويىنشا ۇستالدى، دەپ حابارلايدى “ادىرنا” ۇلتتىق پورتالى.
جەلىدە تاراعان مالىمەتكە سايكەس، زاڭگەر نۇرسۇلتان ورىنبەكوۆ وقيعا تۋرالى ايتتى.
“قازاق روبين گۋد ءىلياس ساريەۆ الاياقتىق بابى بويىنشا ۇستالدى. الماتىدان وسىنداي حابار كەلدى. بىرنەشە ادامنان الاياقتىق ارەكەتىنە قاتىستى ارىز تۇسكەن. قازىر سول بويىنشا ۇستالعانى بەلگىلى بولدى. الدانعاندار بولسا، الماتى ىشكى ىستەر دەپارتامەنتىنە ارىزدانا الادى”، – دەپ جازدى.
الماتى قالالىق پوليتسيا دەپارتامەنتى بۇل اقپاراتتى راستادى.
“المالى اۋداندىق پوليتسيا باسقارماسىنداعى پوليتسيا ءبولىمى الاياقتىق دەرەگى بويىنشا قىلمىستىق ءىس قوزعادى. جان-جاقتى جانە وبەكتيۆتى تەرگەۋگە باعىتتالعان بىرقاتار تەرگەۋ شارالارى جۇرگىزىلىپ جاتىر. ولاردىڭ قورىتىندىسى بويىنشا پروتسەسسۋالدىق شەشىم قابىلداناتىن بولادى”، – دەلىنگەن رەسمي حابارلامادا.
ايتا كەتەيىك، ءىلياس ساريەۆ Instagram جەلىسىندە qazaq_robin_hood لاقاپ اتىمەن تانىمال. ول الەۋمەتتىك جەلىدە ءتۇرلى قايىرىمدىلىق جوبالارىمەن تانىلىپ، حالىق اراسىندا قولداۋ تاپقان تۇلعا رەتىندە بەلگىلى بولعان.
