ەرلان نىعماتۋلين مەن نۇرجان نۇرلانوۆقا رەيدەرلىككە بايلانىستى تۇسكەن ارىزدار قازىرگى ۋاقىتتا قارالىپ جاتىر، دەپ حابارلايدى "ادىرنا" ۇلتتىق پورتالى باس پروكۋراتۋراعا سىلتەپ.
باس پروكۋروردىڭ ورىنباسارى عالىمجان قويگەلديەۆ سەنات كۋلۋارىندا مالىمدەدى.
"نۇرلان مەن ەرلان زايرۋللاۇلىنا قاتىستى رەيدەرلىككە بايلانىستى ارىزدار ءتۇستى. قازىرگى كەزدە ولار قارالۋدا. قانداي دا ءبىر ناقتى مالىمەت بەرۋ ەرتە. ال ارعىن نىعماتۋلينگە كەلسەك، ول – بيۋدجەتتىك قارجىنى جىمقىرۋ دەرەگى بويىنشا تەرگەلىپ جاتقان ءىستىڭ فيگۋرانتى. قاراعاندى وبلىسىنا حوككەي كلۋبىنا بولىنگەن قارجىعا بايلانىستى تەرگەۋ ءجۇرىپ جاتىر. ول حالىقارالىق ىزدەۋدە. ورنالاسقان جەرى انىقتالعان سوڭ، ەكستراديتسيا ماسەلەسى قارالادى", – دەدى قويگەلديەۆ.
ارعىن نىعماتۋلين – ءماجىلىستىڭ ەكس-سپيكەرى نۇرلان نىعماتۋليننىڭ اعاسى. 2024 جىلدىڭ سوڭىندا وعان قاتىستى ءىس باس پروكۋراتۋراعا بەرىلگەن. ول 12 جىلعا دەيىن باس بوستاندىعىنان ايىرۋ جازاسىن قاراستىراتىن باپ بويىنشا ايىپتالىپ وتىر. 2025 جىلدىڭ 6 ناۋرىزىندا ارعىن نىعماتۋلينگ حالىقارالىق ىزدەۋگە جاريالاندى. الايدا ينتەرپولدىڭ اشىق بازاسىندا ونىڭ اتى-ءجونى ازىرگە تىركەلمەگەن.
ەسكە سالساق، نيگماتۋليندەرگە قاتىستى رەيدەرلىك ارەكەتتەرگە بايلانىستى ايىپتاۋلار بىرنەشە رەت ايتىلعان. 2024 جىلدىڭ ناۋرىزىندا فرانشيزا يەسى ناتاليا وۆدەيچۋك پەن ونىڭ كۇيەۋى ەرلان نىعماتۋليندى بيزنەسىن تارتىپ الماق بولدى دەپ ايىپتاپ، ارىز تۇسىرگەن. بۇل فاكت بويىنشا قىلمىستىق ءىس قوزعالعان.
سونىمەن قاتار، 2025 جىلدىڭ 1 ساۋىرىندە نۇرجان نۇرلانوۆقا قاتىستى دا رەيدەرلىككە بايلانىستى ءىس قوزعالعانى حابارلاندى. دەگەنمەن، 9 ساۋىردە ونىڭ بۇل ءىس بويىنشا كۇدىكتى رەتىندە تانىلماعانى بەلگىلى بولدى. ءماجىلىس دەپۋتاتى بۇل جاعدايدى قۇزىرلى ورگانداردىڭ سالعىرتتىعىمەن بايلانىستىردى.
ايتا كەتەيىك، ناۋرىز ايىندا ەرمۇرات باپي نىعماتۋليندەرگە قاتىستى پىكىرىن بىلدىرگەن ەدى.
"مەنىڭ ويىمشا، نىعماتۋليننىڭ وسى ۋاقىتقا دەيىن ەلدەن بوي تاسالاپ ءجۇرۋى - بەكەر ەمەس. ول نەدەن قورقادى؟ نەگە ول ەلدە ەمەس؟ نەگە شەتەلدە ءجۇر؟ دەمەك ول ءبىر نارسەدەن قورقادى. دەمەك ول ءبىر نارسە ءبۇلدىردى. ەندى ونى اقتاپ شىعۋ ماقساتىندا تاپسىرىستار ءتۇسىپ جاتىر", - دەپ جاۋاپ بەرگەن دەپۋتات قازتاگ ءتىلشىسىنىڭ سۇراعىنا.
