Erlan Nyǧmatulin men Nūrjan Nūrlanovqa reiderlıkke bailanysty tüsken aryzdar qazırgı uaqytta qaralyp jatyr, dep habarlaidy "Adyrna" ūlttyq portaly Bas prokuraturaǧa sıltep.
Bas prokurordyŋ orynbasary Ǧalymjan Qoigeldiev Senat kuluarynda mälımdedı.
"Nūrlan men Erlan Zairullaūlyna qatysty reiderlıkke bailanysty aryzdar tüstı. Qazırgı kezde olar qaraluda. Qandai da bır naqty mälımet beru erte. Al Arǧyn Nyǧmatulinge kelsek, ol – biudjettık qarjyny jymqyru deregı boiynşa tergelıp jatqan ıstıŋ figuranty. Qaraǧandy oblysyna hokkei klubyna bölıngen qarjyǧa bailanysty tergeu jürıp jatyr. Ol halyqaralyq ızdeude. Ornalasqan jerı anyqtalǧan soŋ, ekstradisiia mäselesı qaralady", – dedı Qoigeldiev.
Arǧyn Nyǧmatulin – mäjılıstıŋ eks-spikerı Nūrlan Nyǧmatulinnıŋ aǧasy. 2024 jyldyŋ soŋynda oǧan qatysty ıs Bas prokuraturaǧa berılgen. Ol 12 jylǧa deiın bas bostandyǧynan aiyru jazasyn qarastyratyn bap boiynşa aiyptalyp otyr. 2025 jyldyŋ 6 nauryzynda Arǧyn Nyǧmatuling halyqaralyq ızdeuge jariialandy. Alaida İnterpoldyŋ aşyq bazasynda onyŋ aty-jönı äzırge tırkelmegen.
Eske salsaq, Nigmatulinderge qatysty reiderlık äreketterge bailanysty aiyptaular bırneşe ret aitylǧan. 2024 jyldyŋ nauryzynda franşiza iesı Natalia Ovdeichuk pen onyŋ küieuı Erlan Nyǧmatulindı biznesın tartyp almaq boldy dep aiyptap, aryz tüsırgen. Būl fakt boiynşa qylmystyq ıs qozǧalǧan.
Sonymen qatar, 2025 jyldyŋ 1 säuırınde Nūrjan Nūrlanovqa qatysty da reiderlıkke bailanysty ıs qozǧalǧany habarlandy. Degenmen, 9 säuırde onyŋ būl ıs boiynşa küdıktı retınde tanylmaǧany belgılı boldy. Mäjılıs deputaty būl jaǧdaidy qūzyrly organdardyŋ salǧyrttyǧymen bailanystyrdy.
Aita keteiık, nauryz aiynda Ermūrat Bapi Nyǧmatulinderge qatysty pıkırın bıldırgen edı.
"Menıŋ oiymşa, Nyǧmatulinnıŋ osy uaqytqa deiın elden boi tasalap jüruı - beker emes. Ol neden qorqady? Nege ol elde emes? Nege şetelde jür? Demek ol bır närseden qorqady. Demek ol bır närse büldırdı. Endı ony aqtap şyǧu maqsatynda tapsyrystar tüsıp jatyr", - dep jauap bergen deputat QazTAG tılşısınıŋ sūraǧyna.
Ūqsas jaŋalyqtar
