قىتايدىڭ شىڭجاڭ ايماعىنداعى ەركىن ساۋدا ايماعىنىڭ حورگوس ۋچاسكەسى حالىقارالىق قازاق-قىتاي ءتىل كوللەدجىنەن العاشقى تاجىريبەدەن وتۋشىلەر توبىن قابىلدادى، دەپ حابارلايدى "ادىرنا" ۇلتتىق پورتالى سينحۋا اگەنتتىگىنە سىلتەمە جاساپ.
ءۇش اي بويى بۇل كوللەدجدىڭ 30 ستۋدەنتى جەرگىلىكتى بىرنەشە كاسىپورىندا كاسىبي بىلىكتىلىكتەرىن جەتىلدىرەدى.
شىڭجاڭعا (سولتۇستىك-باتىس قىتاي) كەلمەس بۇرىن تاجىريبەدەن وتۋشىلەر ارنايى دايىندىق كۋرسىنان وتكەن. ولار قىتاي تىلىندە جاقسى قارىم-قاتىناس جاساۋ داعدىلارىن مەڭگەرىپ، ترانسشەكارالىق ەلەكتروندى ساۋدا مەن حالىقارالىق كوممەرتسيا سالالارىندا بازالىق كاسىبي بىلىمگە يە.
تاجىريبە بارىسىندا قازاقستاندىق ستۋدەنتتەر ترانسشەكارالىق ەلەكتروندى ساۋدا مەن تسيفرلىق ماركەتينگكە قاتىستى جۇمىستاردا تاجىريبە جينايدى. ولار ناقتى وندىرىستىك جاعدايلارمەن تانىسىپ، قىتايلىق كاسىپورىنداردىڭ شەتەلدىك نارىققا شىعۋ سۇرانىسىن جان-جاقتى زەرتتەيدى. ءاربىر ستۋدەنتكە كاسىپورىنداردا ارنايى تالىمگەر تاعايىندالادى.
حورگوس ەركىن ساۋدا ايماعىنىڭ جوسپارىنا سايكەس، تاجىريبە بارىسىندا ەرەكشە كوزگە تۇسكەن شەتەلدىك ستۋدەنتتەر تاجىريبەدەن وتكەن كاسىپورىنداردا جۇمىسقا قالۋ مۇمكىندىگىنە يە بولادى. بۇل ولارعا وقۋ ورنىن بىتىرە سالىسىمەن جۇمىسقا ورنالاسۋعا جول اشادى.
"بۇل – حالىقارالىق كاسىبي ءبىلىم بەرۋ سالاسىنداعى جاڭا باستامامىز. ول «ءبىر بەلدەۋ، ءبىر جول» باستاماسىنا قاتىسۋشى ەلدەر ءۇشىن جان-جاقتى قابىلەتتى مامانداردى دايىنداۋعا باعىتتالعان", – دەدى حورگوس ەكونوميكالىق دامۋ اۋدانىنىڭ وكىلى يان چۋنمەي.
ونىڭ ايتۋىنشا، بولاشاقتا ورتالىق ازيا ەلدەرىنىڭ جوعارى وقۋ ورىندارىنىڭ قاتىسۋىمەن ء"بىر بەلدەۋ، ءبىر جول" كاسىبي ءبىلىم بەرۋ اليانسىن قۇرۋ جوسپارلانىپ وتىر. بۇل اليانس وقىتۋشىلاردىڭ ءوزارا ساپارلارىنا، بىرلەسكەن وقۋ باعدارلامالارىن ازىرلەۋگە جانە اكادەميالىق الماسۋلاردى جۇزەگە اسىرۋعا ارنالعان تۇراقتى پلاتفورما بولماق.
