7 sáýir kúni keshke Almaty qalasynda aýa raıynyń kúrt qubylyp, jel men nóser jaýyn oryn aldy. Tabıǵattyń tosyn minezi qala turǵyndaryna birqatar qıyndyqtar týdyrdy, dep habarlaıdy “Adyrna” ulttyq portaly.
Áleýmettik jelilerde taraǵan beınejazbalarda jeldiń kúshti ekpinimen úılerdiń shatyrlary ushyp ketkeni, kóshedegi mańdaıshalar men jarnamalyq taqtaıshalardyń synǵany anyq kórinedi.
Taýgúl yqshamaýdanyndaǵy bes qabatty turǵyn úıdiń shatyryn jel ushyryp ketkeni týraly jelide aqparat tarady.
Nóser jaýyn saldarynan keı turǵyn úılerdiń balkondary sý ótkize bastaǵan. Kóshe boıyndaǵy aǵashtar qulap, birneshe kólikke zııan keltirgen. Sonymen qatar, keıbir aýdandarda jaryq pen ınternet ýaqytsha óship qalǵan.
Qala kósheleri shaǵyn ózenderge aınalyp, qozǵalys qıyndady. Degenmen, almatylyqtar qıyndyqqa qaramastan, kóterińki kóńil kúıde qalýǵa tyrysyp jatyr. Jelide «Bálkim, erteń demalys bolar?», «Bul – astanalyqtardyń kóktemdi erte bastaǵanymyzǵa kegi», «Esesine, qala jeldetildi» degen ázilge toly pikirler jazylýda.
Qazgıdromet 7 sáýirden 8 sáýirge qaraǵan túni Almaty men Qonaev qalalarynda burshaq jaýyp, jel ekpini sekýndyna 28 metrge deıin jetetinin eskertken bolatyn. TJD Almaty turǵyndary men qonaqtaryna qaýipsizdik sharalaryn saqtaýǵa, taýǵa serýendeýden bas tartýǵa keńes berdi.
«Elektr jelileriniń bútindigin tekserińizder, kólikterińizdi aǵashtardyń astyna qoımańyzdar, álsiz bekitilgen qurylystardan aýlaq bolyńyzdar – bul adam jaraqatyna ákelýi múmkin», – dep málimdedi qutqarýshylar.
Aıta keteıik, eki kún buryn Almatyda shańdy daýyl soǵyp, qala turǵyndaryna taǵy da qıyndyq týǵyzǵan edi.
