اقش-تىڭ ورتالىق-شىعىس بولىگىندە سوققان جويقىن داۋىلدار سالدارىنان كەمىندە 16 ادام قازا تاپتى، دەپ حابارلايدى "ادىرنا" ۇلتتىق پورتالى Deutsche Welle باسىلىمىنا سىلتەمە جاساپ.
جەرگىلىكتى بيلىكتىڭ مالىمەتىنشە، قاتتى جاۋعان جاڭبىرلار كەڭ كولەمدى سۋ تاسقىندارىن تۋدىرعان. اقش-تىڭ ۇلتتىق مەتەورولوگيالىق قىزمەتى (NWS) 6 ءساۋىر كۇنى تاعى دا قاۋىپتى اۋا رايى قۇبىلىستارى كۇتىلەتىنىن ەسكەرتتى.
اركانزاستان وگايوعا دەيىنگى اۋماقتى قامتىعان داۋىل جۇيەسى سوڭعى كۇندەرى عيماراتتاردى قيراتىپ، جولداردى سۋ باسۋىنا اكەلىپ، ونداعان تورنادو تۋدىرعان.
ەڭ كوپ زارداپ شەككەن — تەننەسسي شتاتى. بۇل شتاتتىڭ باتىس بولىگىندە عانا 10 ادام قازا تاپقانى حابارلاندى.
كەنتۋككيدە سۋ تاسقىنى سالدارىنان ەكى ادام، سونىڭ ىشىندە اۆتوبۋس ايالداماسىنا بارا جاتقان 9 جاسار بالا قازا بولدى. بۇل تۋرالى شتات گۋبەرناتورى ەندي بەشير مالىمدەدى.
"ايتارلىقتاي كۇشتى جانە كەڭ اۋقىمدى كەنەتتەن بولاتىن سۋ تاسقىندارى كۇتىلۋدە. ادام ءومىرى مەن مۇلىكتەرگە ۇلكەن قاۋىپ ءتونىپ تۇر", – دەپ حابارلادى اقش ۇلتتىق مەتەورولوگيالىق قىزمەتى.
جەرگىلىكتى بيلىك پەن باق مالىمەتىنە سايكەس، تاعى ەكى ادامنىڭ ءولىمى ميسسۋري مەن ينديانا شتاتتارىندا تىركەلگەن.
6 ءساۋىر تاڭىنداعى جاعداي بويىنشا اركانزاس پەن تەننەسسي شتاتتارىندا 100 مىڭنان استام ادام ەلەكتر قۋاتىنسىز قالعان.
