5 sáýir kúni Kókshetaý qalasynda on eki aýdan sharýalarynyń qatysýymen aýqymdy jármeńke ótti. Tańerteńnen «Táýelsizdik» alańy merekelik kóńil-kúıge toldy. Jármeńkege aǵylǵan halyq tómen baǵada, sapaly ónim alýǵa asyqty. Aýqymdy shara Aqmola oblysy ákimdiginiń bastamasymen uıymdastyryldy.
Jármeńkege Arshaly, Atbasar, Astrahan, Egindikól, Esil, Ereımentaý, Jaqsy, Jarqaıyń, Qorǵaljyn, elınograd aýdandary men Kókshetaý jáne Qosshy qalalarynan kelgen aýyl eńbekkerleri óz ónimderin ákeldi. Ár óńirdiń dámi men eńbegi jármeńkeniń sánin keltirdi. Usynylǵan ónimderdiń kólemi 100 tonnadan asty. Baǵasy naryqtaǵydan 10–15% arzan.
«Basty maqsat — halyqqa sapaly ónimdi esh deldalsyz, tıimdi baǵamen jetkizý. Bul joly jas maldyń eti molynan ákelindi. Sapany veterınarlyq qyzmet qatań baqylap otyr. Bul shara – áleýmettik mańyzy bar azyq-túlik baǵasyn turaqtandyrýdyń naqty bir qadamy», — dedi oblys ákiminiń orynbasary Ernar Jarkeshov.
Qosshy qalasyndaǵy «Il TOV» JShS-niń ókili Merýert Gýmanova balalarǵa arnalǵan, tez ári ońaı daıyndalatyn jartylaı fabrıkat ónimderin tanystyryp, kópshiliktiń qyzyǵýshylyǵyn týdyrdy.
Sonymen qatar, 30 jyldan beri tabıǵı bal óndirýmen aınalysyp júrgen Arshaly aýdanynyń turǵyny Pavel Rýbosol da óz ónimderin jármeńkede usyndy. Onyń hosh ıisti, tabıǵı baldary túrli óńirlerde joǵary suranysqa ıe bolyp úlgergen.
«Men osyndaı aýyl sharýashylyq jármeńkelerin ótkizbeýge tyrysamyn. Bizdiń ónim suranysqa ıe. Baǵasy da tıimdi», dedi ol.
Jármeńke tek saýda orny ǵana emes, naǵyz mádenı sharaǵa aınaldy. Alańda ornatylǵan sahnada jergilikti ónerpazdar án shyrqap, kórermenderdiń kóńilin kóterdi. Qazaqtyń áýezdi ánderi men halyq kúıleri shyrqalyp, kelgen qonaqtarǵa kóterińki kóńil-kúı syılady.
«Jármeńke óte jaqsy uıymdastyrylǵan. Tikeleı óndirýshiden tómen baǵamen satyp alý bul halyqqa úlken kómek. Ettiń baǵasy basqa jerlerge qaraǵanda áldeqaıda arzan. Ózim et alýǵa arnaıy keldim. Osyndaı sharalar jıi bolyp tursa eken», dep alǵysyn jetkizdi qala turǵyny.
Uıymdastryýshylar Kókshetaýda ótken aýyl sharýashylyǵy jármeńkesinde qala turǵyndaryna sapaly, qoljetimdi ónim usyný arqyly, halyqqa degen shynaıy janashyrlyqty kórsetti.
