پروفەسسور سەرىك مەيىرمانوۆ جاپونيانىڭ جەتەكشى جوعارى وقۋ ورىندارىنىڭ ءبىرى — Ritsumeikan Asia Pacific University (APU) ۋنيۆەرسيتەتىندە ۆيتسە-پرەزيدەنت (پرورەكتور) قىزمەتىنە تاعايىندالدى، دەپ حابارلايدى "ادىرنا" ۇلتتىق پورتالى.
بۇل تۋرالى قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگى ءباسپاسوز قىزمەتىنىڭ جەتەكشىسى ولجاس بەركىنباەۆ ءوزىنىڭ Facebook پاراقشاسىندا جازدى.
«بۇل تاعايىنداۋ ماڭىزدى وقيعا. العاش رەت قازاقستان ازاماتى جاپونياداعى جوعارى وقۋ ورنىنىڭ باسشىلىعىندا وسىنداي جوعارى ءارى جاۋاپتى لاۋازىمدى يەلەنىپ وتىر. بۇل فاكت پروفەسسور مەيىرمانوۆتىڭ تەك كاسىبي جانە جەكە قاسيەتتەرىنىڭ جوعارى باعالانعانىن عانا ەمەس، سونىمەن قاتار قازاقستاننىڭ عىلىمي جانە ءبىلىم بەرۋ مەكتەبىنىڭ حالىقارالىق دەڭگەيدەگى تانىلۋىن كورسەتەدى»، — دەپ جازدى بەركىنباەۆ.
APU ۋنيۆەرسيتەتى بەپپۋ قالاسىندا ورنالاسقان. ۆيتسە-پرەزيدەنت قىزمەتىنە تاعايىندالعانعا دەيىن پروفەسسور سەرىك مەيرمانوۆ وسى ۋنيۆەرسيتەتتە ءۇش جىل بويى اكادەميالىق ماسەلەلەر بويىنشا دەكان قىزمەتىن اتقارعان.
مەيىرمانوۆ قازاقستاندا مەديتسينالىق ءبىلىم العان، ال PhD دارەجەسىن جاپونيادا قورعاعان. ول قازىرگى ۋاقىتتا قازاقستان پرەزيدەنتىنىڭ جانىنداعى عىلىم جانە تەحنولوگيالار جونىندەگى ۇلتتىق كەڭەستىڭ مۇشەسى، سونداي-اق ۇلتتىق عىلىمي كەڭەستىڭ قۇرامىندا شەتەلدىك ساراپشى رەتىندە جۇمىس ىستەيدى.
«مەن ءۇشىن بۇل — ۇلكەن قۇرمەت جانە جاۋاپكەرشىلىك. سونىمەن قاتار، مەن قازاقستاندى وسىنداي دەڭگەيدە حالىقارالىق اكادەميالىق قاۋىمداستىقتا تانىتقانىممەن ماقتانامىن جانە بۇل تاعايىنداۋ جاپونيا مەن قازاقستان اراسىنداعى عىلىمي جانە ءبىلىم بەرۋ بايلانىستارىن نىعايتۋعا قىزمەت ەتەدى دەپ ۇمىتتەنەمىن»، — دەيدى پروفەسسور.
مەيىرمانوۆتىڭ لاۋازىمعا رەسمي كىرۋى 2025 جىلدىڭ 1 ساۋىرىندە ءوتتى.
