نورۆەگيانىڭ كوشى-قون ەرەجەسىن بۇزعان قازاقستاننىڭ 45 ازاماتى دەپورتاتسيالاندى. بۇل تۋرالى 30 قىركۇيەكتە نۇر-سۇلتاندا وتكەن بريفينگتە سىرتقى ىستەر مينيسترلىگى ءباسپاسوز قىزمەتىنىڭ جەتەكشىسى ايبەك سمادياروۆ ايتتى.
مينيسترلىك وكىلىنىڭ ايتۋىنشا، "قازاقستاننىڭ 59 ازاماتى نورۆەگياعا جۇمىس ىزدەپ بارعان، بىراق ولاردا تەك تۋريستىك ۆيزا بولعان. قازىرگە دەيىن 45-ءى قازاقستانعا قايتارىلعان، قالعان 14-ءى بۇگىن دەپورتاتسيالانۋى مۇمكىن".
- نورۆەگياعا شەنگەن ۆيزاسىمەن بارىپ ماۋسىمدىق جۇمىس ىستەۋگە رۇقسات ەتىلمەيدى. قازاقستان ازاماتتارىنا نورۆەگيادا [جۇمىس ىستەۋگە] رۇقسات ەتەتىن قۇجاتتاردى نورۆەگيانىڭ رەسەيدەگى ەلشىلىگى عانا بەرەدى، - دەيدى ايبەك سمادياروۆ.
بۇعان دەيىن نورۆەگيانىڭ VG سايتى "كوشى-قون ەرەجەلەرىن بۇزعان" ءبىر توپ شەتەل ازاماتىنىڭ ۇستالعانىن، ولاردىڭ باسىم بولىگى قازاقستان ازاماتى ەكەنىن جازعان. ۇستالعانداردىڭ 60-تان استامى - قازاقستان، التاۋى - قىرعىزستان، ەكەۋى رەسەي ازاماتى دەپ ايتىلعان.
27 قىركۇيەكتە قازاقستاننىڭ نورۆەگياداعى ەلشىسىنىڭ كەڭەسشى ۋاكىلى تالعات جۇماعۇلوۆ تا "نورۆەگياعا قازاقستاننىڭ 60 ازاماتى زاڭسىز بارعانىن" مالىمدەگەن.
سوڭعى جىلدارى جۇمىس ىستەۋ ماقساتىندا شەتەلگە كەتكەن قازاقستاندىقتار كوبەيگەن. قازاقستان سىرتقى ىستەر مينيسترلىگى وتكەن جىلى وڭتۇستىك كورەيادا شامامەن مىڭداعان قازاقستاندىق زاڭسىز جۇمىس ىستەپ جۇرگەنىن حابارلاعان.
رەسەيلىك كوشى-قون قىزمەتىنىڭ جاقىندا جاريالاعان بايانداماسىنا قاراعاندا، 2019 جىلى قاڭتار مەن ماۋسىم ارالىعىندا رەسەيگە 100 مىڭنان استام قازاقستان ازاماتى جۇمىس ىزدەپ كەلگەن.
"ازاتتىق" راديوسى
