بۇگىن كوكشەتاۋداعى «تاۋەلسىزدىك» الاڭى ناعىز گاسترونوميالىق مەرەكەگە اينالدى – بيىلعى جىلدىڭ العاشقى اۋىل شارۋاشىلىعى جارمەڭكەسى ءوتتى. بۇل شارا اقمولا وبلىسىنىڭ تۇكپىر-تۇكپىرىنەن كەلگەن تاۋار وندىرۋشىلەردى ءبىر شاڭىراق استىنا جينادى. ەت، ءسۇت ونىمدەرى، بال، جاڭا اۋلانعان بالىق، ۇن، كوكونىستەر، جارما، كونديتەرلىك تاعامدار – بارلىعى 70-تەن استام ءونىم ءتۇرى، جالپى سالماعى 82 توننادان اساتىن تاۋار قالا تۇرعىندارى مەن قوناقتارىنا نارىقتاعى باعادان 10-15% تومەن ۇسىنىلدى.
جارمەڭكە اۋماعىندا 45 پاۆيلون قۇرىلىپ، ارقايسىسى بەلگىلى ءبىر ونىمگە ارنالدى: بىرىندە – ەت، ەكىنشىسىندە – ءسۇت ونىمدەرى، ۇشىنشىسىندە – ۇن، ال تورتىنشىسىندە – كوكونىستەر. ساماۋىر قايناپ، اسەم اۋەن شىرقالىپ، بالالار كونتسەرتتى تاماشالاپ جاتقاندا، ەرەسەكتەر اربالارى مەن سومكەلەرىن تولتىرا باستادى. جارمەڭكە اياسىندا قارت ادامدارعا ەرىكتىلەر كومەكتەسىپ، اۋىر سومكەلەرىن كوتەرىپ بەردى.
«الداعى ورازا ايت مەرەكەسى قارساڭىندا وبلىس ورتالىعىندا بيىلعا العاشقى اۋىل شارۋاشىلىعى جارمەڭكەسىن ۇيىمداستىردىق. بۇل – ءار وتباسى ءۇشىن ەرەكشە دايىندىق كەزەڭى. جارمەڭكە – حالىققا قاجەتتى ازىق-تۇلىكتى ءتيىمدى باعادا ساتىپ الۋعا، ال اۋىل شارۋاشىلىعى تاۋار وندىرۋشىلەرىنە ونىمدەرىن ءتيىمدى وتكىزۋگە دە تاماشا مۇمكىندىك»، – دەدى اقمولا وبلىسىنىڭ اكىمى مارات احمەتجانوۆ.
جارمەڭكەگە اقكول، بۋراباي، بۇلاندى، زەرەندى، شورتاندى، ساندىقتاۋ، ءبىرجان سال اۋداندارىنىڭ، سونداي-اق كوكشەتاۋ، ستەپنوگورسك قالالارى مەن «سپك كوكشە» اكتسيونەرلىك قوعامىنىڭ وندىرۋشىلەرى قاتىستى.
«ءبىزدىڭ حالىق ءۇشىن جارمەڭكە تەك ساۋدا ورنى ەمەس، ول – بىرلىك پەن بەرەكەنىڭ كورىنىسى. ادامدار ازىق-تۇلىك الىپ قانا قويماي، كونتسەرت تاماشالاپ، بي بيلەپ، ءبىر-بىرىمەن قاۋىشىپ جاتادى. بۇل – ءبىزدىڭ مادەني كودىمىز. ونىڭ ۇستىنە، مۇنداي شارانىڭ قاسيەتتى رامازان ايىنىڭ سوڭعى كۇنى ۇيىمداستىرىلۋى ەرەكشە مانگە يە. بۇل – كوكتەمنىڭ، مولشىلىق پەن مەيىرىمنىڭ جارشىسى ىسپەتتى»، – دەيدى كوكشەتاۋلىق تۇرعىن ءاليا احمەتوۆا.
جارمەڭكەدە ءونىم ۇسىنعانداردىڭ اراسىندا تاجىريبەلى كاسىپكەرلەر دە بار. سولاردىڭ ءبىرى – ءبىرجان سال اۋدانىنداعى «ءشارىپوۆ» شارۋا قوجالىعىنىڭ وكىلى ءاليا ورازوۆا.
«ءبىز جارمەڭكەلەرگە جىل سايىن قاتىسامىز، ءوزىم وسىندا 13-رەت كەلىپ تۇرمىن. ءبىزدىڭ اۋدان، ەڭ الدىمەن، ءسۇت ونىمدەرىمەن تانىمال. ماي، ىرىمشىك، قۇرت، سۇزبە – ءبارىن اكەلدىك. ارينە، ەت تە بار. اقمولادا سيىر ەتى ساپاسىمەن ەرەكشەلەنەدى، سۇرانىسقا يە. كوپشىلىك ءبىزدى تانيدى، ارنايى ىزدەپ كەلەتىندەر دە از ەمەس»، – دەيدى ول.
جارمەڭكە تەك ازىق-تۇلىكپەن عانا ەمەس، مادەني شارالارمەن دە ەستە قالدى. ساحنا تورىندە اۋدان ونەرپازدارى ءان شىرقاپ، ۇلتتىق بيلەر ورىندالدى. ساۋدا قاتارلارىندا بال، جاڭا پىسكەن نان، جۇمىرتقا، وسىمدىك مايى سىندى ونىمدەر ۇسىنىلدى. جالپى، 100 مىڭنان استام جۇمىرتقا، 30 توننا ەت ونىمدەرى، 16 توننا كوكونىس، 2,6 مىڭ ليتر ماي ساتىلىمعا شىعارىلدى.
ۇيىمداستىرۋشىلار مۇنداي جارمەڭكەلەردىڭ تۇراقتى تۇردە وتەتىنىن ايتتى. اۋىل شارۋاشىلىعى باسقارماسىنىڭ مالىمەتىنشە، وسىنداي جارمەڭكەلەر الداعى ۋاقىتتا دا جالعاسىن تابادى.
«وتەتىن كۇندەرى تۋرالى الدىن الا حابارلاپ وتىرامىز. باستى ماقسات – جەرگىلىكتى اگرارشىلاردى قولداپ، تۇرعىنداردى ساپالى ءارى قولجەتىمدى ازىق-تۇلىكپەن قامتاماسىز ەتۋ»، – دەلىنگەن ۇيىمداستىرۋشىلار اقپاراتىندا.
جارمەڭكەگە جينالعان حالىقتىڭ كوڭىل كۇيىنە قاراپ، بۇل شارا ساۋدا الاڭىنان گورى ءداستۇر مەن جاڭاشىلدىق، ادامدار مەن كوكتەمنىڭ توعىسار مەكەنىنە اينالعانىن اڭعارۋعا بولادى.
