Búgin Kókshetaýdaǵy «Táýelsizdik» alańy naǵyz gastronomııalyq merekege aınaldy – bıylǵy jyldyń alǵashqy aýyl sharýashylyǵy jármeńkesi ótti. Bul shara Aqmola oblysynyń túkpir-túkpirinen kelgen taýar óndirýshilerdi bir shańyraq astyna jınady. Et, sút ónimderi, bal, jańa aýlanǵan balyq, un, kókónister, jarma, kondıterlik taǵamdar – barlyǵy 70-ten astam ónim túri, jalpy salmaǵy 82 tonnadan asatyn taýar qala turǵyndary men qonaqtaryna naryqtaǵy baǵadan 10-15% tómen usynyldy.
Jármeńke aýmaǵynda 45 pavılon qurylyp, árqaısysy belgili bir ónimge arnaldy: birinde – et, ekinshisinde – sút ónimderi, úshinshisinde – un, al tórtinshisinde – kókónister. Samaýyr qaınap, ásem áýen shyrqalyp, balalar konertti tamashalap jatqanda, eresekter arbalary men sómkelerin toltyra bastady. Jármeńke aıasynda qart adamdarǵa eriktiler kómektesip, aýyr sómkelerin kóterip berdi.
«Aldaǵy Oraza aıt merekesi qarsańynda oblys ortalyǵynda bıylǵa alǵashqy aýyl sharýashylyǵy jármeńkesin uıymdastyrdyq. Bul – ár otbasy úshin erekshe daıyndyq kezeńi. Jármeńke – halyqqa qajetti azyq-túlikti tıimdi baǵada satyp alýǵa, al aýyl sharýashylyǵy taýar óndirýshilerine ónimderin tıimdi ótkizýge de tamasha múmkindik», – dedi Aqmola oblysynyń ákimi Marat Ahmetjanov.
Jármeńkege Aqkól, Býrabaı, Bulandy, Zerendi, Shortandy, Sandyqtaý, Birjan sal aýdandarynyń, sondaı-aq Kókshetaý, Stepnogorsk qalalary men «SPK Kókshe» akıonerlik qoǵamynyń óndirýshileri qatysty.
«Bizdiń halyq úshin jármeńke tek saýda orny emes, ol – birlik pen berekeniń kórinisi. Adamdar azyq-túlik alyp qana qoımaı, konert tamashalap, bı bılep, bir-birimen qaýyshyp jatady. Bul – bizdiń mádenı kodymyz. Onyń ústine, mundaı sharanyń qasıetti Ramazan aıynyń sońǵy kúni uıymdastyrylýy erekshe mánge ıe. Bul – kóktemniń, molshylyq pen meıirimniń jarshysy ispetti», – deıdi kókshetaýlyq turǵyn Álııa Ahmetova.
Jármeńkede ónim usynǵandardyń arasynda tájirıbeli kásipkerler de bar. Solardyń biri – Birjan sal aýdanyndaǵy «Sháripov» sharýa qojalyǵynyń ókili Álııa Orazova.
«Biz jármeńkelerge jyl saıyn qatysamyz, ózim osynda 13-ret kelip turmyn. Bizdiń aýdan, eń aldymen, sút ónimderimen tanymal. Maı, irimshik, qurt, súzbe – bárin ákeldik. Árıne, et te bar. Aqmolada sıyr eti sapasymen erekshelenedi, suranysqa ıe. Kópshilik bizdi tanıdy, arnaıy izdep keletinder de az emes», – deıdi ol.
Jármeńke tek azyq-túlikpen ǵana emes, mádenı sharalarmen de este qaldy. Sahna tórinde aýdan ónerpazdary án shyrqap, ulttyq bıler oryndaldy. Saýda qatarlarynda bal, jańa pisken nan, jumyrtqa, ósimdik maıy syndy ónimder usynyldy. Jalpy, 100 myńnan astam jumyrtqa, 30 tonna et ónimderi, 16 tonna kókónis, 2,6 myń lıtr maı satylymǵa shyǵaryldy.
Uıymdastyrýshylar mundaı jármeńkelerdiń turaqty túrde ótetinin aıtty. Aýyl sharýashylyǵy basqarmasynyń málimetinshe, osyndaı jármeńkeler aldaǵy ýaqytta da jalǵasyn tabady.
«Ótetin kúnderi týraly aldyn ala habarlap otyramyz. Basty maqsat – jergilikti agrarshylardy qoldap, turǵyndardy sapaly ári qoljetimdi azyq-túlikpen qamtamasyz etý», – delingen uıymdastyrýshylar aqparatynda.
Jármeńkege jınalǵan halyqtyń kóńil kúıine qarap, bul shara saýda alańynan góri dástúr men jańashyldyq, adamdar men kóktemniń toǵysar mekenine aınalǵanyn ańǵarýǵa bolady.
